Bouncy Castle: గాలులకు ఎగిరిపోయిన బౌన్సి క్యాసల్‌.. నలుగురు చిన్నారుల మృత్యువాత

కాన్‌బెర్రా: పాఠశాల చివరి రోజు.. తర్వాత క్రిస్మస్‌ సెలవులు.. ఈ సంతోషంలోనే ఆటలాడుకుంటున్నారు ఓ ప్రైమరీ స్కూల్‌ విద్యార్థులు. వారిలో కొంతమంది బౌన్సి క్యాసల్‌పై ఉత్సాహంగా గంతులేస్తున్నారు. కానీ, ఈ చిన్నారులకు ఊహించని ప్రమాదం ఎదురైంది. ఒక్కసారిగా వీచిన బలమైన గాలులకు ఆ క్యాసల్‌ కాస్త.. అమాంతం పది మీటర్లకుపైగా ఎత్తుకు ఎగిరిపోయింది. పిల్లలూ దాంట్లోనే ఉన్నారు. క్షణాల్లోనే అంతెత్తునుంచి ఒక్కసారిగా కిందపడిన ఘటనలో.. వారిలో నలుగురు మృతి చెందారు. పలువురికి తీవ్ర గాయాలయ్యాయి. ఆస్ట్రేలియాలోని ఉత్తర టాస్మానియాలో గురువారం ఈ విషాదం చోటుచేసుకుంది.

10-12 ఏళ్లలోపు వారే..

విద్యాసంవత్సరం ముగియనుండటంతో.. ఇక్కడి డెవాన్‌పోర్ట్‌లోని హిల్‌క్రెస్ట్‌ ప్రైమరీ స్కూల్‌ యాజమాన్యం పిల్లలకు ఈ ఏర్పాట్లు చేసింది. వారి తల్లిదండ్రులనూ ఆహ్వానించింది. ఈ క్రమంలోనే ఈ దుర్ఘటన చోటుచేసుకుంది. ‘నలుగురు పిల్లలు చనిపోయారు. మరో అయిదుగురి పరిస్థితి విషమంగా ఉంది’ అని స్థానిక పోలీసు కమిషనర్ డారెన్ హైన్ చెప్పారు. మృతుల్లో ఇద్దరు బాలురు, ఇద్దరు బాలికలు ఉన్నారని, వారంతా 10- 12 ఏళ్లలోపు వారేనని తెలిపారు. ఈ ఘటనపై విచారణ చేపడుతున్నామన్నారు. ప్రమాద సమాచారం అందుకున్న వెంటనే రెస్క్యూ హెలికాప్టర్లు, అంబులెన్సులు ఘటనా స్థలానికి చేరుకున్నాయి. మరోవైపు ఆస్ట్రేలియా ప్రధాని స్కాట్ మోరిసన్ ఈ ఘటనపై దిగ్భ్రాంతి వ్యక్తం చేశారు.