పెళ్లి గురించి మాట్లాడదామని పిలిచి..

బెంగళూరు: బెంగళూరుకు చెందిన యువకుడు లక్ష్మీపతి, ఓ యువతి మూడేళ్లుగా ప్రేమించుకుంటున్నారు. ఒకే చోట పని చేస్తున్న వీళ్లద్దరూ పెళ్లి చేసుకుందామని నిశ్చయించుకొని ఇంట్లో వాళ్లకు చెప్పారు. మతాలు వేరు కావడంలో పెద్దలు వీరి పెళ్లికి ఒప్పుకోలేదు. ఈ క్రమంలో గత నెల లక్ష్మీపతి, యువతి ఇంటి నుంచి పారిపోయి పెళ్లి చేసుకున్నారు. ఇటీవల యువతి తండ్రి లక్ష్మీపతికి ఫోన్‌ చేసి మాట్లాడారు. జరిగిందేదో జరిగిపోయింది.. తిరిగి వెనక్కి వచ్చేయమన్నారు. తన కూతురితో పెళ్లి చేయడానికి తమకు ఎలాంటి అభ్యంతరం లేదని చెప్పారు. పెళ్లి గురించి మాట్లాడటానికి రమ్మని పిలిచారు. 

తొలుత పెళ్లికి నిరాకరించిన యువతి తల్లిదండ్రులే వివాహానికి ఒప్పుకోవడంతో లక్ష్మీపతి సంతోషించారు. పెళ్లి గురించి మాట్లాడటానికి లక్ష్మీపతి అన్న నటరాజుతో కలిసి యువతి తండ్రి చెప్పిన ప్రదేశానికి వెళ్లారు. తన కూతురిని తీసుకెళ్లి పెళ్లి చేసుకున్నాడన్న కోపంతో ఉన్న యువతి తండ్రి చంపాలనే ఉద్దేశంతో పిలిపించాడని లక్ష్మీపతి తెలుసుకోలేకపోయాడు. మంగళవారం ఉదయం అన్నదమ్ములిద్దరినీ యువతి బంధువులు బెంగళూరు పట్టణ శివారు ప్రాంతానికి తీసుకెళ్లారు. 

అక్కడ మద్యం సేవించిన వాళ్లు అన్నదమ్ములిద్దరినీ కొట్టారు. కులం పేరుతో వారిని దూషించారు. లక్ష్మీపతిని బెల్టుసాయంతో గొంతు బిగించి హత్య చేశారు. నటరాజ్‌ను సైతం కొట్టిన వాళ్లు ఈ విషయం ఎవరికైనా చెబితే ఇంటిల్లిపాదిని చంపేస్తామని బెదిరించారు. అక్కడి నుంచి బయటపడిన నటరాజ్‌ పోలీసులను ఆశ్రయించాడు. కేసు నమోదు చేసిన పోలీసులు యువతి తండ్రి, సోదరుడిని అరెస్టు చేశారు. హత్యకు కారణమైన మరో ఇద్దరు పరారీలో ఉన్నట్లు పోలీసులు తెలిపారు.