కొట్టుకుంటూ.. వీధుల్లో ఈడ్చుకెళ్లి...

● మహిళపై ఏడుగురు వ్యక్తుల మూకుమ్మడి దాడి

● కాపాడమని కేకలు పెట్టినా...స్పందించని స్థానికులు

గోపాలపట్నం : కుటుంబ కలహాల నేపథ్యంలో ఏడుగురు వ్యక్తులు ఓ మహిళపై నిర్థాక్షిణ్యంగా దాడి చేసి... వీధుల్లో కొట్టుకుంటూ సుమారు అరకిలోమీటరు మేర జట్టు పట్టుకుని ఈడ్చుకెళ్లినా... చూసిన వారెవ్వరూ స్పందించలేదు. ఈ హృదయవిదారక సంఘటన శనివారం సాయంత్రం గోపాలపట్నంలో జరిగింది. స్థానిక పోలీసులు తెలిపిన వివరాల మేరకు... విశాఖ నగరానికి చెందిన గుత్తి లక్ష్మి (35) తన భర్త నాగరాజు, కుమారుడితో కలిసి జీవీఎంసీ 66వ వార్డు ఎల్లపువానిపాలెం గ్రామంలో గత ఏడేళ్లుగా అద్దింట్లో నివాసం ఉంటోంది. భర్త ప్రైవేటు ఆసుపత్రిలో పని చేస్తుండగా ఆమె ఇంటి వద్దే ఉంటుంది. శనివారం సాయంత్రం ఇంట్లో ఆమె భర్త నాగరాజు లేని సమయంలో నగరానికి చెందిన అయిదుగురు మహిళలు, మరో ఇద్దరు పురుషులు కలిసి కారులో వచ్చారు. గ్రామ శివారులో కారుని ఉంచి లక్ష్మి వద్దకు వచ్చారు. ఆమెపై మూకుమ్మడిగా దాడి చేసి... కొట్టుకుంటూ వీధుల వెంబడి తీసుకెళ్లారు. కాపాడమని బాధితురాలు కేకలు పెట్టినా... స్థానికులు స్పందించలేదు. మానవత్వం మరిచిపోయిన వారంతా మహిళ రోదనను పెడచెవిన పెట్టారు. అలా ముందుకు తీసుకెళ్లిన వారు అక్కడ నుంచి బాధితురాలిని కారులో తీసుకెళ్లిపోయారు. తీవ్ర గాయాలపాలైన బాధితురాలి ఆరోగ్య పరిస్థితి విషమంగా ఉందని విశ్వసనీయ సమాచారం.