గురుకుల పాఠశాలలో ప్రవేశాలకు కౌన్సెలింగ్‌

కశింకోట, న్యూస్‌టుడే: కశింకోట మండలం తాళ్లపాలెం డా.అంబేడ్కర్‌ గురుకుల పాఠశాలలో 5వ తరగతి ప్రవేశానికి గురువారం నిర్వహించిన కౌన్సెలింగ్‌ ప్రశాంతంగా జరిగింది. ఉమ్మడి జిల్లాలకు చెందిన గురుకులాల్లో (తాళ్లపాలెంతో సహా కొక్కిరాపల్లి, నక్కపల్లి, నర్సీపట్నం, మేఘాద్రిగెడ్డ, కోనాం, మధురవాడ) ప్రవేశానికి ఈ కౌన్సెలింగ్‌ నిర్వహించారు. విద్యార్థులకు గురుకుల సమన్వయాధికారి ఎస్‌.రూపావతి ఆధ్వర్యంలో ప్రిన్సిపల్‌ జి.గ్రేస్‌తో 6 పాఠశాలల ప్రధానోపాధ్యాయులు ఉదయం 10 నుంచి సాయంత్రం 5 గంటల వరకు కౌన్సెలింగ్‌ నిర్వహించారు. ఉమ్మడి జిల్లావ్యాప్తంగా మిగిలిన 183 సీట్లకు గాను 88 మంది విద్యార్థులు ప్రవేశం పొందారని రూపావతి తెలిపారు. ఈ మేరకు ఎంపికైన విద్యార్థుల తల్లిదండ్రులకు ఎంపిక పత్రాలు అందజేశారు.