ఆగని ఇసుక రవాణా

కొనసాగుతున్న తవ్వకాలు

పెద్దపప్పూరు, న్యూస్‌టుడే: పెద్దపప్పూరులోని అక్రమ ఇసుక రీచ్‌పై పత్రికల్లో పలు కథనాలు వచ్చినా.. అధికారుల అలసత్వంతో అక్రమార్కులు మరింత పేట్రేగిపోతున్నారు. పత్రికల్లో వచ్చిన వార్తలను అడ్డుపెట్టుకొని సంబంధిత అధికారులు మరింత చేతివాటం ప్రదర్శిస్తున్నట్లు సమాచారం. పది రోజులుగా ఎలాంటి అనుమతులు లేకుండా మండలకేంద్రం పెద్దపప్పూరులో అనధికార ఇసుక రీచ్‌ను వైకాపా నాయకులు నిర్వహిస్తున్నారు. దీన్ని అరికట్టాల్సిన అధికారులు నిమ్మకు నీరెత్తినట్లు వ్యవహరిస్తున్నారు. జనావాసాల మధ్య మండల కేంద్రమైన పెద్దపప్పూరుకు సమీపంలో ఇసుక రీచ్‌ను నిర్వహిస్తున్నా సంబంధిత అధికారుల చోద్యం చూస్తున్నారని ప్రజలు ఆరోపిస్తున్నారు. పోలీసుస్టేషన్‌, జూనియర్‌ కళాశాల, ప్రభుత్వ ఉన్నత పాఠశాల, బీసీ బాలుర వసతి గృహం, మౌర్య, శ్రీసాయిరాం ఉన్నత పాఠశాలలు ఉన్న ప్రధాన రహదారిపై నిత్యం వందలాది ట్రిప్పుల ఇసుకను అక్రమంగా తరలిస్తున్నారు. ఇటీవల చిన్నపప్పూరులోని అశ్వర్థ ఆలయ సమీపంలో పెన్నానదిలో గుంతలో పడి తాడిపత్రికి చెందిన యువకుడు నీటిలో మునిగి మృతిచెందాడు. ఇప్పటికైనా సంబంధిత అధికారులు స్పందించి ఇసుక అక్రమంగా తరలిపోకుండా చర్యలు చేపట్టి ప్రజల ప్రాణాలకు రక్షణగా నిలవాలని కోరుతున్నారు. దీనిపై భూగర్భ గనులశాఖ ఏడీని చరవాణిలో ‘న్యూస్‌టుడే’ సంప్రదించగా ఆయన స్పందించలేదు.