జనవరిలో బటన్‌ నొక్కినా..జమకాని ఆసరా నిధులు

వెలుగు కార్యాలయం ముందు నిరసన తెలుపుతున్న డ్వాక్రా సంఘాల మహిళలు

 రామగిరి, న్యూస్‌టుడే : ప్రభుత్వం డ్వాక్రా సంఘాల సభ్యులకు అందిస్తున్న నాలుగో విడత ఆసరా పథకం నగదు ఇంతవరకూ తమ ఖాతాలకు జమ కాలేదని డ్వాక్రా సంఘాల మహిళలు మంగళవారం వెలుగు కార్యాలయం ముందు నిరసన తెలిపారు. ఈ సందర్భంగా సిబ్బందితో వాగ్వాదానికి దిగారు. సీఎం జనవరిలో బటన్‌ నొక్కి  ఖాతాలకు డబ్బులు వేస్తున్నట్లు చెప్పారని, మండల వ్యాప్తంగా 2,300 మందికి ఎందుకు జమ కాలేదని అధికారులను నిలదీశారు. మూడు నెలలు కావస్తున్నా ఇంతవరకూ ఆసరా నగదు వేయలేదని ఆగ్రహం వ్యక్తం చేశారు. మహిళలు డబ్బుల కోసం బ్యాంకుల చుట్ట్టూ ప్రదక్షిణ చేస్తున్నారని, ఎప్పుడు జమ చేస్తారో చెప్పాలని ప్రశ్నించారు. ఇప్పటికే కొంతమంది మహిళలకు నగదు జమైందని, ఓసీ కార్పొరేషన్‌ ద్వారా జమ కావాల్సిన నగదు అందలేదని అధికారులు తెలిపారు. దీంతో మహిళలు తీవ్ర ఆగ్రహం వ్యక్తం చేశారు. సకాలంలో నగదు ఇవ్వనప్పుడు ఎందుకు బటన్‌ నొక్కాలంటూ నిరాశతో వెనుదిరిగారు.