రక్తనిధి కేంద్రంపై కేసు

నల్లకుంట, న్యూస్‌టుడే: తలసేమియా వ్యాధితో బాధపడుతున్న చిన్నారి రక్తంలో హెచ్‌ఐవీ ఉందని తేలిన ఘటనలో రక్తనిధి కేంద్రంపై కేసు నమోదైన సంఘటన నల్లకుంట పోలీస్‌ స్టేషన్‌లో చోటుచేసుకుంది. సీఐ మొగిలిచర్ల రవి తెలిపిన వివరాల ప్రకారం... రంగారెడ్డి జిల్లాకు చెందిన మూడేళ్ల బాలుడు తలసేమియాతో బాధపడుతున్నాడు. రెండున్నరేళ్లుగా విద్యానగర్‌లోని రెడ్‌ క్రాస్‌ రక్తనిధి కేంద్రంలో 15 రోజులకోసారి బాలునికి రక్తం ఎక్కిస్తున్నారు. జులై 20న రక్తం ఎక్కించడానికి వెళ్లినప్పుడు పరీక్షించిన వైద్యులు చిన్నారి రక్తంలో హెచ్‌ఐవీ ఉన్నట్లు నిర్ధారించారు. బాలుని తండ్రి జులై 30న పోలీసులకు ఫిర్యాదు చేశాడు. వైద్యాధికారుల సూచనలు, సలహాలు తీసుకొని సోమవారం ఆ రక్తనిధి కేంద్రంపై కేసు నమోదు చేసినట్లు సీఐ వివరించారు.