18న డీకే అరుణ నామపత్రం దాఖలు

హాజరు కానున్న కేంద్ర మంత్రి పీయూష్‌ గోయల్‌

మహబూబ్‌నగర్‌ గ్రామీణం, న్యూస్‌టుడే : మహబూబ్‌నగర్‌ భాజపా లోక్‌సభ అభ్యర్థి డీకే అరుణ ఈ నెల 18వ తేదీ ఉదయం 11 గంటలకు నామినేషన్‌ దాఖలు చేయనున్నట్లు పార్టీ మహబూబ్‌నగర్‌ జిల్లా అధ్యక్షుడు పి.శ్రీనివాస్‌రెడ్డి తెలిపారు. ఈ కార్యక్రమానికి కేంద్ర వాణిజ్యం, పరిశ్రమల శాఖ మంత్రి పీయూష్‌ గోయల్‌ ముఖ్య అతిథిగా హాజరవుతారని చెప్పారు. ఉదయం 9 గంటలకు కేంద్ర మంత్రితో కలిసి డీకే అరుణ పిల్లలమర్రి రహదారిలోని శ్రీవేంకటేశ్వరస్వామి ఆలయంలో పూజలు నిర్వహిస్తారని, అక్కడి నుంచి భాజపా నాయకులు, కార్యకర్తలతో కలిసి భారీ ర్యాలీతో కలెక్టరేట్‌కు చేరుకొని నామినేషన్‌ దాఖలు చేస్తారని వివరించారు. నామినేషన్‌ దాఖలు అనంతరం కలెక్టరేట్‌ నుంచి భగీరథ కాలనీ వరకు డీకే అరుణ ద్విచక్రవాహన ర్యాలీతో వస్తారని, భగీరథ కాలనీ నుంచి పాదయాత్రతో వన్‌టౌన్‌ కూడలి, రామమందిర్‌ కూడలి, పాన్‌ చౌరస్తా మీదుగా క్లాక్‌టవర్‌ కూడలికి చేరుకుంటారని తెలిపారు. క్లాక్‌టవర్‌ వద్ద ఏర్పాటు చేయబోయే కార్నర్‌ మీటింగ్‌లో ప్రజలను ఉద్దేశించి కేంద్ర మంత్రి ప్రసంగిస్తారని చెప్పారు.