నియంత్రిక దగ్ధం.. రూ.37 లక్షల నష్టం

ఎగసిపడుతున్న మంటలు

డిచ్‌పల్లి గ్రామీణం : బర్దీపూర్‌ ఎత్తిపోతల పథకానికి సంబంధించిన 2000 కేవీ కెపాసిటీ గల భారీ నియంత్రికలో గురువారం ఉదయం మంటలు చెలరేగాయి. పూర్తిగా దగ్ధమవడంతో దాదాపు రూ.37 లక్షల నష్టం వాటిల్లినట్లు కర్షకులు చెప్పారు. ఈ విషయంపై రైతులు మాట్లాడుతూ.. ఆర్టీసీ ఛైర్మన్‌ బాజిరెడ్డి గోవర్ధన్‌ సహకారంతో ఆయకట్టు వారందరం కలిసి నియంత్రికను మంజూరు చేయించుకున్నట్లు తెలిపారు. గతేడాది మార్చిలో దీన్ని బిగించుకోగా.. నిర్వహణను తామే చూసుకుంటున్నట్లు పేర్కొన్నారు. కాలిపోవడంతో ఇబ్బందులు వస్తాయని, మరో నియంత్రికను ప్రభుత్వం మంజూరు చేయాలని కోరారు. ప్రమాదానికి గల కారణాలు తెలియరాలేదు. ఘటనా స్థలాన్ని విద్యుత్తు శాఖ ఎస్‌ఈ రవీందర్‌, అధికారులు ఉత్తమ్‌, రాజేశ్వర్‌, రాజేందర్‌, నీటి పారుదలశాఖ అధికారులు గంగాధర్‌, శ్రీచంద్‌, కిరణ్‌ పరిశీలించారు.