హోరు గాలి.. భీకర ఉరుములు!!

నేలకూలిన విద్యుత్తు స్తంభాలు.. చెట్లు

అప్పటి వరకు ప్రశాంతంగా ఉన్న వాతావరణం ఒక్కసారిగా మారిపోయింది. మంగళవారం అర్ధరాత్రి తరువాత కారుమబ్బులు కమ్ముకొని ఉరుములు మెరుపులతో కూడిన వర్షం కురిసింది.

ఈనాడు, విశాఖపట్నం: భీకర గాలులకు పెద్ద సంఖ్యలో చెట్లు, విద్యుత్తు స్తంభాలు నేలకొరిగాయి. లోతట్టు ప్రాంతాల్లోకి వర్షపు నీరు చేరింది. గాజువాక, మరికొన్ని ప్రాంతాల్లోని కాలనీల్లో మురుగు కాలువలు పొంగడంతో ఇళ్లల్లోకి నీరు చేరింది. ఉరుముల భీకర శబ్దాలకు ప్రజలు హడలిపోయారు. మంగళవారం అర్ధరాత్రి నుంచి బుధవారం ఉదయం వరకు విశాఖ జిల్లాలో పలు చోట్ల అత్యధిక వర్షపాతం నమోదైంది. పరదేశీపాలెంలో 120 మిల్లీమీటర్ల వర్షపాతం నమోదైంది. అలాగే వంద మి.మీ.కు మించి మల్కాపురం,  గంగవరం , శ్రీహరిపురాల్లో కురిసింది. పలు ప్రాంతాల్లో విద్యుత్తు సరఫరాకు అంతరాయం ఏర్పడగా అధికారులు సత్వరం స్పందించి పునరుద్ధరించారు.