ఆర్టీసీ ప్రయాణికులపై జేబు దొంగల కన్ను

రద్దీ సమయంలో పర్సుల అపహరణ

పోలీసులకు వివరాలు చెబుతున్న బాధితుడు

అనకాపల్లి పట్టణం, న్యూస్‌టుడే: బస్సుల కొరత జేబు దొంగలకు కలిసొచ్చింది. విజయవాడలో వైకాపా నిర్వహించిన జయహో బీసీ గర్జన కార్యక్రమానికి అనకాపల్లి డిపో నుంచి 47 బస్సులను పంపారు. డిపోలో మొత్తం 77 బస్సులు ఉంటే అందులో రెండొంతులు విజయవాడ వెళ్లిపోవడంతో సాధారణ ప్రయాణికులకు బస్సులు అందుబాటులో లేకుండా పోయాయి. బుధవారం సాయంత్రం విజయనగరం వెళ్లే బస్సు కోసం ప్రయాణికులు చాలా సమయం నిరీక్షించాల్సి వచ్చింది. బస్సు వచ్చేసరికి ప్రయాణికులు పరుగులు తీశారు. రద్దీ ఏర్పడడంతో జేబు దొంగలు పనికానిచ్చేశారు. అడ్డతీగల మండలం గొడ్డివానిపాలెంకి చెందిన కె.సోమరాజు భార్య, పిల్లలతో కలసి మల్లినాయుడుపాలెం వెళ్లడానికి బస్సు ఎక్కుతుండగా జేబులోని పర్సును కాజేశారు. రూ. 20వేల నగదు పోయినట్లు బాధితుడు వాపోయాడు. అమలాపురానికి చెందిన సీహెచ్‌.నీలిమ సబ్బవరం మండలం అమృతపురం వెళ్లడానికి విజయనగరం బస్సు ఎక్కుతుండగా పర్సును కాజేశారు. అందులో రూ. 2 వేల నగదు, సెల్‌ఫోన్‌ ఉన్నాయని బాధితురాలు వాపోయారు. బాధితులు దీనిపై పోలీసులకు సమాచారం ఇచ్చారు. పట్టణ ఎస్సై సత్యనారాయణ సిబ్బందితో సంఘటన స్థలానికి వచ్చారు. బస్సును చాలాసేపు ఆపి ప్రయాణికులను పరిశీలించినా ప్రయోజనం లేకుండాపోయింది. అనకాపల్లి నుంచి వివిధ ప్రాంతాలకు వెళ్లేందుకు తగిన బస్సులు లేక ప్రయాణికులు తీవ్ర ఇబ్బందులు పడాల్సి వచ్చింది.