మీ కష్టం ఉంచుకోను.. తగు రీతిలో చూసుకుంటా

గ్రామ వాలంటీర్లకు విప్‌ ధర్మశ్రీ ఆడియో సందేశం

చోడవరం, న్యూస్‌టుడే: ‘డియర్‌ వాలంటీర్స్‌.. మీ అందరికీ హ్యాపీ శ్రీరామ నవమి. చంద్రబాబు మీపై చేసిన ఫిర్యాదు మేరకు రాజీనామా చేసి పంచాయతీ కార్యదర్శులకు అందజేయండి. నెల రోజుల్లో మళ్లీ మనమే అధికారంలోకి వస్తున్నాం. ఆయనే (సీఎం జగన్‌) మిమ్మల్ని రీఇన్‌స్టిట్యూట్‌ చేస్తారు. మీరంతా జాప్యం చేయకుండా ముఖ్యమంత్రికి మద్దతుగా రాజీనామా చేయండి. ఏ ఇళ్లకు మీరు వెళ్లి సేవలు అందించారో.. అవే ఇళ్లకు వెళ్లి ఎన్నికల్లో నాకు ఓటేయించండి. మీ కష్టానికి తగు రీతిలో చూసుకుంటా. దయచేసి సహకరించండి. ఈ రోజే రాజీనామా చేసేయండి. ఫ్లీజ్‌..’ అంటూ విప్‌ కరణం ధర్మశ్రీ గ్రామ వాలంటీర్లకు బుధవారం ఆడియో సందేశం పంపారు. ఇది సామాజిక మాధ్యమాల్లో వైరల్‌ అవుతోంది. ఎన్నికల ప్రచారంలో తెదేపా అధినేత చంద్రబాబు కూటమి ప్రభుత్వం అధికారంలోకి రాగానే నెలకు రూ.పది వేల చొప్పున వేతనం ఇస్తామని ప్రకటించడంతో గ్రామ వాలంటీర్లలో పునరాలోచన మొదలైంది. చాలామంది రాజీనామా చేసేందుకు వెనకడుగు వేశారు. దీంతో వైకాపా నాయకులో ఆందోళన మొదలైంది. ఈ నేపథ్యంలో విప్‌ ధర్మశ్రీ గ్రామ వాలంటీర్ల సెల్‌ఫోన్లకు ఆడియో సందేశం పంపడం స్థానికంగా చర్చనీయాంశమైంది.