ఇచ్చిపుచ్చుకున్న నోడల్‌ అధికారులు

ఈనాడు డిజిటల్‌, అమరావతి: రాష్ట్ర సచివాలయంలో ఆదివారం ఎన్నికల విధుల్లో పాల్గొనే రెగ్యులర్‌ (ఫాం-12), అత్యవసర సేవల (ఫాం-12డి) ఉద్యోగులకు సంబంధించిన పోస్టల్‌ బ్యాలట్ల సెంట్రల్‌ ఎక్స్‌ఛేంజ్‌ కార్యక్రమం నిర్వహించారు. అదనపు సీఈఓ హరీంద్రప్రసాద్‌ ఆధ్వర్యంలో జరిగిన ఈ కార్యక్రమంలో 26 జిల్లాల పోస్టల్‌ బ్యాలట్‌ నోడల్‌ అధికారులు పాల్గొన్నారు. తమ జిల్లాలకు చెందిన ఉద్యోగుల పోస్టల్‌ బ్యాలట్లను వారు మార్పిడి చేసుకున్నారు. తొలి విడతగా 80,111 ఫాం-12లు, 10,123 ఫాం-12డీలు అందజేసినట్లు సీఈఓ కార్యాలయం ఓ ప్రకటనలో వెల్లడించింది. అత్యధికంగా విశాఖ జిల్లా నుంచి 5,625, అల్లూరి సీతారామరాజు జిల్లా నుంచి అత్యల్పంగా 969 ఫాం-12 దరఖాస్తులు వచ్చాయి. ఫాం-12డీకి సంబంధించి అత్యధికంగా పల్నాడు జిల్లా నుంచి 999, అత్యల్పంగా శ్రీకాకుళం జిల్లా నుంచి 25 దరఖాస్తులు అందాయి. మే 3న మళ్లీ సెంట్రల్‌ ఎక్స్‌ఛేంజ్‌ కార్యక్రమం నిర్వహించనున్నారు. అనంతరం ఖాళీ పోస్టల్‌ బ్యాలట్లను సంబంధిత ఉద్యోగులకు అందజేస్తారు. వారు ఓటేసిన తర్వాత ఆయా బ్యాలట్లను మే 10న తిరిగి ఇదే కార్యక్రమం ద్వారా ఆయా జిల్లాలకు పంపుతారు.