పోస్టల్‌ బ్యాలట్‌తో వైకాపాకు బుద్ధి చెప్పాలి
తెదేపా ఎమ్మెల్సీ అశోక్‌బాబు

ఈనాడు డిజిటల్‌, అమరావతి: వైకాపా వాళ్లు కూపన్‌లు, బహుమతులు ఇచ్చి ప్రభుత్వ ఉద్యోగుల్ని ప్రలోభపెట్టాలని చూస్తున్నారని తెదేపా ఎమ్మెల్సీ అశోక్‌బాబు ఆగ్రహం వ్యక్తం చేశారు. ప్రభుత్వ ఉద్యోగులు, ఉపాధ్యాయుల్ని అన్ని విధాలుగా మోసం చేసిన సీఎం జగన్‌ మాయలో మళ్లీ పడొద్దని వారిని హెచ్చరించారు.  పోస్టల్‌ బ్యాలట్‌తో అధికార పార్టీ నాయకులకు బుద్ధి చెప్పాలని పిలుపునిచ్చారు. పరోక్షంగా ఎన్నికల విధుల్లో ఉండే డ్రైవర్లు, ఇతర సిబ్బందికి పోస్టల్‌ బ్యాలట్‌ ఓటు కల్పించాలని కోరారు. మంగళగిరిలోని తెదేపా కేంద్ర కార్యాలయంలో గురువారం ఆయన విలేకరులతో మాట్లాడారు. ‘‘ఈ ప్రభుత్వం ఉపాధ్యాయుల్ని లిక్కర్‌ షాపుల దగ్గర కాపలా ఉంచింది. వారితో మరుగుదొడ్ల ఫొటోలు తీయిస్తూ..అవమానిస్తోంది. డీఏ బకాయిలు ఇవ్వకుండా వేధిస్తోంది. ఏ నెలా ఒకటో తేదీన జీతం ఇవ్వలేదు. వారంలో సీపీఎస్‌ను రద్దు చేస్తామని మోసం చేశారు’’ అని అశోక్‌బాబు మండిపడ్డారు. ఎన్డీయే ప్రభుత్వం వచ్చిన వెంటనే సీపీఎస్‌ రద్దు చేసిన రాష్ట్రాల్లో ఉన్న పరిస్థితుల్ని అధ్యయనం చేసి..ఉద్యోగులతో చర్చించి ఆమోదయోగ్యమైన నిర్ణయం తీసుకోనున్నట్లు వివరించారు. 2019 ఎన్నికల్లో పెద్ద సంఖ్యలో పోస్టల్‌ బ్యాలట్‌ ఓట్లు తిరస్కరణకు గురవ్వడంపై అనుమానం వ్యక్తం చేశారు.