బైరెడ్డిపల్లె, న్యూస్‌టుడే: చిత్తూరు జిల్లా బైరెడ్డిపల్లె అగస్థి పెట్రోల్‌ బంకు వద్ద ఆలపల్లె వైకాపా సర్పంచి రమణారెడ్డి కారులో 58 కేసుల కర్ణాటక మద్యాన్ని డిప్యూటీ కలెక్టర్‌ లక్ష్మీప్రసన్న, జిల్లా ఫ్లయింగ్‌ స్క్వాడ్‌ బృందం, పోలీసులు శనివారం పట్టుకున్నారు. స్వాధీనం చేసుకున్న మద్యం విలువ రూ.3,50,700 ఉంటుందని, నిందితుడిపై కేసు నమోదు చేసినట్లు ఎస్సై కృష్ణయ్య తెలిపారు. పలమనేరులో శనివారం నిర్వహించిన ముఖ్యమంత్రి జగన్‌ సభకు వైకాపా నాయకులు భారీగా జనసమీకరణ చేశారు. సభకు వచ్చిన వారికి పంపిణీ చేయడానికే ఈ మద్యాన్ని తీసుకొచ్చినట్లు ఆరోపణలున్నాయి.