జంగమహేశ్వరపాడులో స్వాధీనం చేసుకున్న పోలీసులు

ఈనాడు డిజిటల్‌ - నరసరావుపేట, దుర్గి - న్యూస్‌టుడే: కొద్దిరోజుల్లో పోలింగ్‌ జరగనున్న వేళ పల్నాడు జిల్లా మాచర్ల నియోజకవర్గంలో నాటుబాంబులు బయటపడటం కలకలం సృష్టించింది. పోలీసుల కథనం ప్రకారం.. దుర్గి మండలంలోని జంగమహేశ్వరపాడులో నాటుబాంబులతో పాటు, మారణాయుధాలు ఉన్నాయనే సమాచారం మేరకు ఎస్సై ఎస్‌.కోటయ్య సిబ్బందితో వెళ్లి తనిఖీలు చేపట్టారు. నిర్మాణంలో ఉన్న ఓ ఇంటి నుంచి ఆరు కత్తులు, ఒక గొడ్డలి, పది ఇనుప రాడ్లు, 17 నాటు బాంబులను గుర్తించి స్వాధీనం చేసుకున్నారు. ఆ ఇంటిని తెదేపా సానుభూతిపరుడు నాగరాజు ఇల్లుగా గుర్తించారు. ఆ ఇంటి నిర్మాణాన్ని అయిదేళ్ల క్రితం మొదలుపెట్టి మధ్యలోనే నిలిపివేశారు. నాగరాజు ప్రస్తుతం గ్రామంలో ఉండటం లేదు. ఊరునుంచి వెళ్లిపోయిన తెదేపా సానుభూతిపరులు కూడా ఐదేళ్ల తర్వాత మూడు రోజుల క్రితమే గ్రామంలో అడుగుపెట్టారు. ఎక్కడికక్కడ పోలీసు పికెటింగ్‌ ఉన్నప్పటికీ ఇంట్లోకి నాటుబాంబులు ఎలా వచ్చాయనేది అంతు చిక్కడం లేదు. సీసీ కెమెరాలు పరిశీలిస్తున్నామని, ఎవరిపైనా కేసులు నమోదు చేయలేదని గురజాల డీఎస్పీ పళ్లంరాజు వెల్లడించారు.

2019లో ఏం జరిగింది?

2019 ఎన్నికల ఫలితాల తర్వాత వైకాపా వర్గాల దాడులు పెరిగిపోవడంతో తెదేపాను అభిమానించే 60 కుటుంబాలు గ్రామాన్ని వదిలి వెళ్లిపోయాయి. వారం క్రితం హైకోర్టు ఆదేశాలతో పోలీసులు గ్రామాన్ని వదలి వెళ్లిన కొందరిని తీసుకొచ్చారు. అందులో నాగరాజు కూడా ఒకరు. ‘నేను మూడు రోజుల క్రితమే ఊరికి వచ్చాను. ఇప్పటి వరకు ఆ ఇంట్లోకే వెళ్లలేదు. అక్రమంగా కేసుల్లో ఇరికించేందుకే ఇలా నాటుబాంబుల పథకం వేశారు’ అని నాగరాజు వాపోయారు.