అమరావతి: పాపాల పెద్దిరెడ్డీ.. నీ పాపాలు శిశుపాలుడిని మించిపోయాయని తెదేపా జాతీయ ప్రధాన కార్యదర్శి నారా లోకేశ్‌ ఎక్స్‌(ట్విటర్‌) వేదికగా విమర్శించారు. అన్నమయ్య జిల్లాలో గర్భిణిపై వైకాపా నేతల దాడిని ఆయన ఖండించారు. తాగునీరు అడగటమే ఆమె చేసిన పాప‌మా అని ప్రశ్నించారు. నిండు గ‌ర్భిణి అని చూడ‌కుండా అమాన‌వీయ దాడి చేశారని ఆగ్రహం వ్యక్తం చేశారు. ఇన్నాళ్లూ సాగించిన అరాచ‌కాలకు ప్రజా క్షేత్రంలో దోషులుగా నిల‌వ‌క త‌ప్పదన్నారు. ఎమ్మెల్యే అభ్యర్థి పెద్దిరెడ్డి ద్వారకానాథ్ రెడ్డి సతీమణి ఎన్నికల ప్రచారం చేస్తుండగా బాధిత మహిళ తాగునీటి సమస్యపై నిల‌దీసింద‌ని తెలిపారు. దీంతో నిండు గ‌ర్భిణిపై వైకాపా నేతలు దాడులు చేశారని వివరించారు. ‘‘పెద్దిరెడ్డీ!.. మీ పాపాల‌కు త‌గిన శిక్ష మే 13న జ‌నం విధిస్తారు’’ అని లోకేశ్‌ హెచ్చరించారు.