అమరావతి: రాష్ట్ర వ్యాప్తంగా 4,44,216 మంది ఉద్యోగులు పోస్టల్‌ బ్యాలెట్‌ ఓటింగ్‌ వినియోగించుకున్నట్లు ఆంధ్రప్రదేశ్‌ ప్రధాన ఎన్నికల అధికారి (సీఈవో) ముకేశ్‌కుమార్‌ మీనా తెలిపారు. మే 4 నుంచి నుంచి 9వ తేదీ వరకు 6 రోజుల పాటు పోస్టల్‌ ఓటింగ్‌ ప్రక్రియ కొనసాగిందన్నారు. నెల్లూరు పార్లమెంటు పరిధిలో అత్యధికంగా 22,650 పోస్టల్ ఓట్లు నమోదు కాగా... అత్యల్పంగా అమలాపురం పార్లమెంటు పరిధిలో 14,526 ఓట్లు పోలైనట్లు తెలిపారు. పోలైన పోస్టల్‌ బ్యాలెట్లను స్ట్రాంగ్‌ రూమ్‌లకు తరలిస్తున్నట్లు చెప్పారు. 

అనంతపురం, తూర్పు, పశ్చిమగోదావరి జిల్లాలు సహా 14 నియోజకవర్గాల్లో వందశాతం వెబ్‌కాస్టింగ్‌ నిర్వహించాలని నిర్ణయించినట్లు సీఈవో పేర్కొన్నారు. ఎంపిక చేసిన నియోజకవర్గాల్లో అన్ని సౌకర్యాలు ఉండేలా 28 మోడల్‌ పోలింగ్‌ స్టేషన్లు ఏర్పాటు చేస్తున్నట్లు చెప్పారు. పల్నాడు సహా సున్నితమైన ప్రాంతాల్లోని పోలింగ్‌ కేంద్రాల్లో రెండేసి సీసీ కెమెరాలను ఏర్పాటు చేస్తున్నామన్నారు. సీఈవో కార్యాలయంతోపాటు అన్ని జిల్లాల్లోని కంట్రోల్‌ రూమ్‌ల ద్వారా పోలింగ్‌ తీరును పర్యవేక్షిస్తామని ముకేశ్‌కుమార్‌ మీనా స్పష్టం చేశారు.