మంగళగిరి: జగన్‌ను అధికారంలో ఉంచడమే సీఎస్‌ జవహర్‌రెడ్డి లక్ష్యమని తెదేపా సీనియర్‌నేత వర్ల రామయ్య ఆరోపించారు. మంగళగిరిలోని తెదేపా కేంద్ర కార్యాలయంలో ఏర్పాటు చేసిన మీడియా సమావేశంలో ఆయన మాట్లాడారు. పింఛన్‌ డబ్బులు బ్యాంకులో జమ చేయడం కాదు.. వృద్ధులకు చేరడం ముఖ్యమన్నారు. బ్యాంకుల నుంచి ఇంకా 50శాతం మంది లబ్ధిదారులకు పింఛను సొమ్ము అందలేదన్నారు.

పింఛన్లు అందక ఇబ్బంది పడిన వృద్ధుల ఉసురు జగన్‌, జవహర్‌రెడ్డికి తప్పకుండా తగులుతుందన్నారు. రాజకీయ లబ్ధికోసం జగన్‌ ఏదైనా చేయగలరన్నారు. మద్యం దుకాణాల వద్ద టీచర్లను కాపలా పెట్టిన ఘనత ఆయనదేనని విమర్శించారు. రాష్ట్రంలో దాదాపు 4లక్షల మంది టీచర్లు, అంగన్‌వాడీ సిబ్బంది, సచివాలయ ఉద్యోగులు ఉన్నారు. ఈ ప్రభుత్వానికి మానవత్వం ఉంటే వారి సేవలు ఉపయోగించుకొని.. 64లక్షల మంది పింఛనుదారులకు రెండ్రోజుల్లో ఇంటింటికీ వెళ్లి అందించవచ్చని చెప్పారు. మే 13న రాష్ట్ర ప్రజలందరూ ఓటు ద్వారా రాక్షస పాలనకు ముగింపు పలకాలని వర్ల రామయ్య పిలుపునిచ్చారు.