Poonch attack: ‘ఆ 20 నిమిషాలు నా పిల్లలు ఏడుస్తూనే ఉన్నారు’: పూంఛ్ ఉగ్రదాడిపై ప్రత్యక్షసాక్షి

దిల్లీ: జమ్మూ-కశ్మీర్‌ (Jammu and Kashmir)లో పూంఛ్‌ జిల్లాలో భారత వైమానిక దళానికి (ఐఏఎఫ్‌) చెందిన వాహన శ్రేణిపై ఉగ్రవాదులు గత శనివారం ఒక్కసారిగా కాల్పులకు తెగబడిన సంగతి తెలిసిందే. ఈ ఘటనలో అయిదుగురు సైనికులు గాయపడగా.. అందులో ఒకరు చికిత్స పొందుతూ ప్రాణాలు కోల్పోయారు. దీనిని దగ్గరుండి చూసిన ఒక వ్యక్తి ఆ రోజు జరిగిన దాడి గురించి వెల్లడించారు.(Poonch attack)

‘‘ఆ సమయంలో భద్రతా బలగాలు, ఉగ్రవాదులకు మధ్య ఎన్‌కౌంటర్ జరిగింది. 20 నిమిషాల పాటు కాల్పులు చోటుచేసుకున్నాయి. ఆ శబ్దాలకు నా పిల్లలు భయపడిపోయి, ఏడ్వడం మొదలుపెట్టారు. కొంతమంది సైనికులకు గాయాలయ్యాయని, అందులో ఒకరు మరణించారని తర్వాత తెలిసింది. ఈ ప్రాంతమంతా చెట్లు దట్టంగా ఉండటంతో ఎంతమంది ఉగ్రవాదులు వచ్చారో కచ్చితంగా తెలియలేదు. ఈ ప్రాంతంలో ఇలా ఒక ఎన్‌కౌంటర్ జరగడం ఇదే తొలిసారి. ఆ సమయంలో నా పిల్లల భద్రత గురించి భయం వేసింది. ఉగ్రవాదుల కోసం బలగాలు ఇంకా సెర్చ్‌ ఆపరేషన్‌ను కొనసాగిస్తున్నాయి’’ అని ఆ ప్రత్యక్ష సాక్షి వెల్లడించారు. ఉగ్రదాడి అనుమానితుల ఫొటోలను సైన్యం విడుదల చేసింది. ఈ ఘటనలో ప్రాణాలు కోల్పోయిన కార్పొరల్‌ పహాడే.. తన పిల్లలకు చాక్లెట్లు ఇచ్చేవారని, వారితో సరదాగా ఆడేందుకు ఆగేవారని ఆ వ్యక్తి చెప్పారు.