మాజీ ఎంపీ అతీక్‌ అహ్మద్‌కు జీవితఖైదు

2006 నాటి కిడ్నాప్‌ కేసులో  కోర్టు తీర్పు

ప్రయాగ్‌రాజ్‌: ఉత్తర్‌ప్రదేశ్‌లోని ప్రయాగ్‌రాజ్‌ ప్రజాప్రతినిధుల కోర్టు 2006 నాటి ఉమేశ్‌పాల్‌ అపహరణ కేసులో గ్యాంగ్‌స్టర్‌, సమాజ్‌వాదీ పార్టీ మాజీ ఎంపీ అతీక్‌ అహ్మద్‌ను మంగళవారం దోషిగా తేల్చింది. అహ్మద్‌ సోదరుడు ఖలీద్‌ అజీంతోపాటు మరో ఆరుగురిని నిర్దోషులుగా విడుదల చేసింది. ఈ కేసులో అహ్మద్‌తోపాటు న్యాయవాది సౌలత్‌ హనీఫ్‌, దినేశ్‌ పాసీ అనే మరో ఇద్దరిని దోషులుగా తేల్చారు. ఈ ముగ్గురికీ కఠిన జీవితఖైదు, రూ.లక్ష చొప్పున జరిమానా విధించారు. జరిమానాను బాధిత కుటుంబానికి అందజేయాలని కోర్టు ఆదేశించినట్లు ప్రభుత్వ న్యాయవాది తెలిపారు. 2005లో జరిగిన బీఎస్పీ ఎమ్మెల్యే రాజుపాల్‌ హత్యకేసులో అతీక్‌ అహ్మద్‌ ప్రధాన నిందితుడు కాగా, ఈ కేసులో నాటి జడ్పీ సభ్యుడైన ఉమేశ్‌పాల్‌ ప్రధానసాక్షి. ఇప్పటిదాకా అహ్మద్‌పై నమోదైన వందకు పైగా కేసుల్లో శిక్షపడిన కేసు ఇదే మొదటిది కావడం విశేషం. కాగా, ఈ ఏడాది ఫిబ్రవరి 24న ఉమేశ్‌పాల్‌ను ప్రయాగ్‌రాజ్‌లో దుండగులు బహిరంగంగా కాల్చి చంపిన విషయం తెలిసిందే. ఈ ఉదంతంలోనూ అహ్మద్‌, అష్రఫ్‌ సోదరులపై నమోదైన కుట్రకేసు విచారణలో ఉంది. కోర్టు తీర్పు అనంతరం నైనీ (యూపీ) కేంద్ర కారాగారానికి అహ్మద్‌ను తిరిగి తీసుకువెళుతుండగా పోలీసు వ్యాన్‌ లోపలి నుంచి ఆయన మాట్లాడుతూ.. ‘నేను కోర్టును గౌరవిస్తా. కానీ, ఈ తీర్పు సరికాదు. దీనిపై హైకోర్టుకు వెళతా’ అని ప్రకటించారు.