జడ్జీల పోస్టుల్లోనూ మహిళలకు 33 శాతం ఇవ్వండి

సీజేఐకి ఎస్‌సీబీఏ మాజీ అధ్యక్షుడి లేఖ

దిల్లీ: చట్టసభల్లో మహిళలకు 33 శాతం రిజర్వేషన్లు కల్పించే బిల్లుకు పార్లమెంటు ఆమోదం తెలిపిన నేపథ్యంలో... ఉన్నత న్యాయస్థానాల్లోని జడ్జీల పోస్టులకూ ఈ కోటాను వర్తింపజేయాలని సుప్రీంకోర్టు బార్‌ అసోసియేషన్‌ (ఎస్‌సీబీఏ) మాజీ అధ్యక్షుడు వికాస్‌ సింగ్‌ విజ్ఞప్తి చేశారు. ఈ మేరకు ఆయన సీజేఐ జస్టిస్‌ డి.వై.చంద్రచూడ్‌కు లేఖ రాశారు. పట్నా, ఉత్తరాఖండ్‌, త్రిపుర, మేఘాలయ, మణిపుర్‌ హైకోర్టులలో ప్రస్తుతం ఒక్క మహిళా జడ్జీ కూడా లేరని తెలిపారు. దేశంలో మిగిలిన 20 హైకోర్టులలో న్యాయమూర్తులుగా 670 మంది పురుషులు ఉంటే, మహిళా జడ్జీల సంఖ్య 103 మాత్రమేనని వివరించారు.