నా ప్రార్థన వల్లే కుమారుడికి కొత్త అవకాశం

ఏకే ఆంటోనీ భార్య ఎలిజబెత్‌

తిరువనంతపురం: తన ప్రార్థనల వల్లే కుమారుడు అనిల్‌కు రాజకీయాల్లో కొత్త అవకాశం లభించిందని సీనియర్‌ కాంగ్రెస్‌ నాయకుడు, రక్షణ శాఖ మాజీ మంత్రి ఏకే ఆంటోనీ భార్య ఎలిజబెత్‌ సమర్థించుకొంటున్న వీడియో కేరళలో కలకలం సృష్టిస్తోంది. కాంగ్రెస్‌ అగ్రనేత సోనియా గాంధీకి సన్నిహితుడైన ఆంటోనీ కుమారుడు అనిల్‌ ఆంటోనీ ఏప్రిల్‌లో కాంగ్రెస్‌ను వీడి భాజపాలో చేరారు. ఇది ఆంటోనీకి దిగ్భ్రాంతి కలిగించింది. భాజపాలో చేరవలసిందిగా ప్రధానమంత్రి కార్యాలయం నుంచి పిలుపు వచ్చినట్లు అనిల్‌ తనకు ముందే చెప్పినా, ఆ విషయం తాను బయటపెట్టలేదని ఆయన తల్లి ఎలిజబెత్‌ వెల్లడించారు. అసలు తన ప్రార్థనల వల్లే భర్త ఆంటోనీకి కాంగ్రెస్‌ కార్యవర్గంలో సభ్యత్వం లభించిందని, అనిల్‌ చర్యతో కుటుంబంలో తలెత్తిన విభేదాలూ సమసిపోయాయని ఆమె తెలిపారు. తనకు మొదట్లో భాజపా అంటే తిరస్కార భావం ఉన్నా ప్రార్థనల వల్ల తన మనసు మారిందని చెప్పారు.