India Corona: 1,150 కొత్త కేసులు.. 83 మరణాలు

దిల్లీ: దేశంలో కరోనావైరస్ కట్టడిలోనే ఉంది. తాజాగా 4.6 లక్షల మందికి వైద్య పరీక్షలు నిర్వహించగా.. 1,150 మందికి వైరస్‌ సోకినట్లు తేలింది. ముందురోజు కంటే కాస్త అధికంగా కేసులు నమోదయ్యాయి. 24 గంటల వ్యవధిలో 1,194 మంది కొవిడ్ నుంచి కోలుకున్నారు. క్రియాశీల కేసులు 11,365కి తగ్గి ఊరటనిస్తున్నాయి. ఇక నిన్న 83 మంది ప్రాణాలు కోల్పోయారు. ఈ మరణాల్లో హెచ్చుతగ్గులకు కేరళ మునుపటి గణాంకాలను సవరిస్తుండటమే కారణం. ఆ ఒక్క రాష్ట్రమే 75 మరణాలను వెల్లడించింది. ఈ రెండేళ్ల కాలంలో 4.30 కోట్ల మందికి కరోనా సోకగా.. అందులో 98.76 శాతం మంది వైరస్‌ నుంచి బయటపడ్డారు. బాధితుల సంఖ్య 0.03 శాతానికి తగ్గిపోయింది. మరణాలు రేటు 1.21 శాతంగా ఉంది. ఇక నిన్న 14.7 లక్షల మంది టీకా తీసుకోగా.. నిన్నటివరకూ 185 కోట్లకు పైగా డోసులు పంపిణీ అయ్యాయని కేంద్రం తెలిపింది.