Ajay: ‘డోంట్‌ టచ్‌’ అంటూ ఆమె నాపై కేకలు వేసింది: నటుడు అజయ్‌

హైదరాబాద్‌: గతంలో నెగెటివ్‌ షేడ్స్‌ ఉన్న పాత్రల్లో నటించి.. ప్రస్తుతం సహాయనటుడిగా కొనసాగుతున్నారు నటుడు అజయ్‌ (Ajay). సుమారు రెండు దశాబ్దాల నుంచి ఇండస్ట్రీలో ఉన్న అజయ్‌కు తెలుగు ప్రేక్షకుల్లో మంచి పేరు ఉంది. అయితే, కెరీర్‌ పరంగా తనకు ఎదురైన ఓ చేదు సంఘటన గురించి తాజాగా ఓ ఇంటర్వ్యూలో ఆయన వెల్లడించారు. ఓ సినిమా సెట్‌లో అందరి ముందు నటి తనపై కేకలు వేసిందని అన్నారు. ఆ క్షణం తనకు ఇబ్బందిగా అనిపించిందని చెప్పారు.

‘‘శ్రీహరి హీరోగా విజయన్‌ దర్శకత్వంలో తెరకెక్కిన ఓ సినిమాలో నేనొక కీలక పాత్ర పోషించాను. సెట్‌లోకి అడుగుపెట్టిన తర్వాతే రేప్‌ సీన్‌ షూట్‌ అని నాకు చెప్పారు. తీరా, సీన్‌ షూట్‌ చేస్తున్నప్పుడు సదరు నటి (ఉత్తరాదికి చెందిన ఓ మోడల్‌) వెంటనే.. ‘డోంట్‌ టచ్‌’ అని కేకలు వేసింది. రేప్‌ సీన్‌ షూట్‌ అని ఆమెకు చెప్పారో లేదో నాకు తెలియదు. కానీ, ఆక్షణం నాకు చాలా ఇబ్బందికరంగా అనిపించింది. నా కెరీర్‌లో నేను ఎదుర్కొన్న ఒక చేదు సంఘటన అదే. కొంతసేపటి తర్వాత ఆ సీన్‌ మొత్తాన్ని రీ రైట్‌ చేసి షూట్‌ చేశారు’’ అని అజయ్‌ వివరించారు. అంతేకాకుండా ఆ తర్వాత తానెప్పుడూ అలాంటి సీన్స్‌లో నటించే ప్రయత్నం చేయలేదని చెప్పారు. 

‘విక్రమార్కుడు’, ‘ఆర్య-2’, ‘దూకుడు’, ‘రాజన్న’, ‘గబ్బర్‌సింగ్‌’, ‘18 పేజీస్‌’, ‘విరూపాక్ష’ వంటి చిత్రాలతో మంచి పేరు తెచ్చుకున్న అజయ్‌ ప్రస్తుతం ‘చక్రవ్యూహం’లో నటిస్తున్నారు. మధుసూదన్‌ దర్శకుడు. సస్పెన్స్‌, క్రైమ్‌ థ్రిల్లర్‌గా తెరకెక్కిన ఈసినిమాలో అజయ్‌ పోలీస్‌ పాత్రలో నటించారు. ఈ సినిమా ప్రమోషన్స్‌లో భాగంగా ఇచ్చిన ఓ ఇంటర్వ్యూలో ఆయన తన కెరీర్‌ గురించి మాట్లాడారు.