raid2: మరోసారి ‘రైడ్‌’ చేయడానికి..!

అజయ్‌ దేవగణ్‌ ప్రధాన పాత్రలో వాస్తవ సంఘటనల ఆధారంగా రాజ్‌ కుమార్‌ గుప్తా దర్శకత్వంలో తెరకెక్కిన చిత్రం ‘రైడ్‌’. 2018లో వచ్చిన ఈ సినిమా మంచి విజయాన్ని అందుకుంది. 1981లో సర్దార్‌ ఇందర్‌ సింగ్‌ ఇంటిపై ఆదాయపు పన్ను శాఖ అధికారులు జరిపిన రైడ్‌ ఆధారంగా ఈ చిత్రాన్ని రూపొందించారు. ‘ఈ దేశ పేదరికానికి కారణం పేదలు కాదు.. వారి దగ్గర దోచుకునే ధనవంతులు’ అని ‘రైడ్‌’లో అజయ్‌ యాక్షన్‌ హంగామా ఆకట్టుకుంది. పనోరమ స్టూడియోస్‌, టీ-సిరీస్‌ సంయుక్తంగా నిర్మించిన ఆ చిత్రానికి సీక్వెల్‌ రానున్నట్లు చిత్రబృందం శనివారం అధికారికంగా ప్రకటించింది. నవంబరు 15న సినిమాని విడుదల చేయనున్నట్లు ప్రకటిస్తూ దానికి సంబంధించిన ఫొటోను సామాజిక మాధ్యమాల వేదికగా పంచుకుంది. ‘‘రైడ్‌ 2’ కోసం ఐఆర్‌ఎస్‌ అధికారి అమయ్‌ పట్నాయక్‌గా అజయ్‌ దేవగణ్‌ తిరిగి రంగంలోకి దిగనున్నారు. మరో అతిపెద్ద కేసును నవంబరు 15న తెరపై చూపించేందుకు సిద్ధమవుతున్నారు’ అంటూ వ్యాఖ్యల్ని జోడించింది. సస్పెన్స్‌ కథనంతో, థ్రిల్లింగ్‌ అంశాలతో  ఈ చిత్రం అలరించనుందని సన్నిహిత వర్గాలు తెలిపాయి.