Allu Arjun: అల్లు అర్జున్‌కు అరుదైన గౌరవం

ఇంటర్నెట్‌ డెస్క్: టాలీవుడ్‌ ప్రముఖ నటుడు అల్లు అర్జున్‌ (Allu Arjun) అరుదైన గౌరవం దక్కించుకున్నారు. ప్రతిష్ఠాత్మకంగా భావించే బెర్లిన్‌ అంతర్జాతీయ చలన చిత్రోత్సవాల్లో భారతీయ సినిమా తరఫున ప్రాతినిధ్యం వహించే అవకాశం అందుకున్నారు. వేడుకల్లో పాల్గొనేందుకు ఆయన ఇప్పటికే జర్మనీకి పయనమయ్యారు. ఆ దేశ రాజధాని బెర్లిన్‌లో ఫిబ్రవరి 15న మొదలైన ఈ ఫిల్మ్‌ ఫెస్టివల్‌ 25 వరకు జరగనుంది (74th Berlin International Film Festival). ఆ వేదికపై ‘పుష్ప’ సినిమాని ప్రదర్శించనున్నారు.

‘పుష్ప’ సినిమాతో అర్జున్‌ విశేష క్రేజ్‌ సంపాదించుకోవడంతోపాటు ఉత్తమ నటుడిగా జాతీయ అవార్డు అందుకున్న సంగతి తెలిసిందే. టాలీవుడ్‌ నుంచి ఈ పురస్కారం దక్కించుకున్న తొలి హీరోగా రికార్డు సృష్టించారు. ఆ సినిమా సీక్వెల్‌ ‘పుష్ప 2’తో ఇప్పుడు బిజీగా ఉన్నారు. సుకుమార్‌ తెరకెక్కిస్తున్న ఈ చిత్రం ఆగస్టు 15న విడుదల కానుంది. ఇది పూర్తయిన తర్వాత అర్జున్‌.. త్రివిక్రమ్ దర్శకత్వంలో నటించనున్నారు. ఇంతకు ముందు ఈ కాంబోలో ‘జులాయి’, ‘సన్నాఫ్‌ సత్యమూర్తి’, ‘అల వైకుంఠపురములో’ సినిమాలు వచ్చాయి.