Pushpa: ‘పుష్ప’ హిందీ వర్షెన్‌లో అల్లుఅర్జున్‌కి వాయిస్‌ ఇచ్చింది ఈ నటుడే!

ఇంటర్నెట్‌ డెస్క్‌: టాలీవుడ్‌ కథానాయకుడు అల్లు అర్జున్‌ తొలిసారి నటించిన పాన్‌ ఇండియా చిత్రం ‘పుష్ప’.   డిసెంబర్‌ 17న  తెలుగు, హిందీ, కన్నడ, మలయాళం, తమిళ భాషల్లో  విడుదలకానుంది. దక్షిణాదితో పాటు ఉత్తరాదిన అల్లు అర్జున్‌కి మంచి క్రేజ్‌ ఉంది. ఇటీవలే హిందీలో విడుదలైన పుష్ప ట్రైలర్‌కి చక్కటి ఆదరణ లభించింది. అందులో హిందీ డబ్బింగ్‌ వాయిస్‌ అల్లుఅర్జున్‌ది కాకపోవడంతో ఈ వాయిస్‌ ఎవరిదై ఉంటుందా అని వెతకడం మొదలు పెట్టారు ఆయన అభిమానులు.  ఓం శాంతి ఓంలో నటించిన శ్రేయాస్‌ తల్పడే గాత్రం అందించారు. ఇదే విషయాన్ని ఆయన అభిమానులతో పంచుకున్నారు. ‘‘ భారతదేశపు పవర్‌ఫుల్‌, స్టైలిష్‌ స్టార్‌ అల్లుఅర్జున్‌ నటించిన  ‘పుష్ప’ హిందీ వర్షెన్‌కు వాయిస్‌ ఇచ్చా. చాలా గర్వంగా, సంతోషంగా ఉంది’’ అంటూ ట్వీట్‌ చేశారు. నటుడిగానే కాకుండా దర్శకుడు, నిర్మాతగా పేరొందారు శ్రేయాస్‌ తల్పడే. గోల్‌మాల్‌ రిటర్న్స్‌, గోల్‌మాల్‌ 3, హౌస్‌ఫుల్‌ 2, గోల్‌మాల్‌ అగైన్‌ వంటి  హిందీ చిత్రాలతో పాటు పలు మరాఠీ చిత్రాల్లోనూ నటించారు.