Balakrishna: రూ.100కోట్ల క్లబ్‌లోకి ‘భగవంత్‌ కేసరి’..

ఇంటర్నెట్‌ డెస్క్‌: బాలకృష్ణ (Balakrishna) హీరోగా అనిల్‌ రావిపూడి దర్శకత్వంలో వచ్చిన చిత్రం ‘భగవంత్‌ కేసరి’. దసరా కానుకగా ప్రేక్షకుల ముందుకు వచ్చిన ఈ సినిమా సూపర్ హిట్‌ టాక్‌ను సొంతం చేసుకుంది. తాజాగా ఈ చిత్రం రూ.100కోట్ల క్లబ్‌లోకి చేరినట్లు నిర్మాణసంస్థ ప్రకటించింది. ఈ విషయాన్ని తెలుపుతూ దసరా విన్నర్ ‘భగవంత్‌ కేసరి’ (Bhagavanth kesari)అంటూ ఓ పోస్టర్‌ను విడుదల చేసింది.

ఆడపిల్లలను సింహాల్లా పెంచాలనే మంచి సందేశంతో రూపొందిన ఈ చిత్రంలోని డైలాగులకు ప్రేక్షకులు ఫిదా అయ్యారు. నేలకొండ భగవంత్‌కేసరి పాత్రలో బాలకృష్ణ తన యాక్టింగ్‌తో అదరగొట్టారు. అలాగే అనిల్‌ రావిపూడి తెరకెక్కించిన యాక్షన్‌ ఎపిసోడ్స్‌ ఆడియన్స్‌ను ఆకట్టుకున్నాయి. దీంతో ఈ సినిమాకు ఊహించిన దాని కంటే మంచి స్పందన వచ్చింది. అక్టోబర్‌ 19న ప్రేక్షకుల ముందుకు వచ్చిన ఈ చిత్రం తొలిరోజే రూ.30కోట్లకు పైగా వసూళ్లు చేసింది. ఇప్పటి వరకు రూ.104కోట్లను వసూళ్లు చేసినట్లు చిత్రబృందం తెలిపింది. ఇక యూఎస్‌లోనూ ఈ సినిమా వన్‌ మిలియన్‌ డాలర్ల మార్క్‌ను చేరుకుంది. బాలకృష్ణ నటించిన వరుస సినిమాలు రూ.100కోట్ల క్లబ్‌లో చేరడంతో ఫ్యాన్స్‌ ‘ఖుష్’ అవుతున్నారు.

‘లియో’.. థియేటర్‌లో స్క్రీన్‌ చింపేసిన ఎగ్జిబిటర్‌..!

మరోవైపు ఈ సినిమాలో కొత్తగా ఒక పాటను యాడ్‌ చేస్తున్నట్లు చిత్రబృందం తాజాగా వెల్లడించింది. ఈ సినిమా కోసం ‘దంచవేమేనత్త  కూతురా’ పాటను రీమేక్‌ చేశారు. ఇప్పుడు అభిమానులు, ప్రేక్షకుల కోరిక మేరకు దాన్ని యాడ్‌ చేస్తున్నారు. ఇక తాజాగా ఈ సినిమా విజయోత్సవ వేడుకను హైదరాబాద్‌లో నిర్వహించారు. అందులో బాలకృష్ణ మాట్లాడుతూ ‘‘భగవంత్‌ కేసరి’ ఒక విస్పోటనంతో పుట్టింది. ప్రతి మహిళ తనని తాను తర్ఫీదు చేసుకొని ఒక సైనికుడిలా తయారవ్వాలన్న సందేశం ఈ సినిమాతో ప్రేక్షకుల్లోకి వెళ్లింది’’ అన్నారు.