Chiranjeevi: సుకుమార్‌ దర్శకత్వంలో చిరంజీవి!

ఇంటర్నెట్‌ డెస్క్‌: ప్రముఖ నటుడు చిరంజీవిని డైరెక్ట్‌ చేసే అవకాశం అందుకున్నారు దర్శకుడు సుకుమార్‌. ఈ విషయాన్ని ఆయన సోషల్‌ మీడియా వేదికగా అభిమానులతో పంచుకున్నారు. ‘‘మెగాస్టార్‌ను డైరెక్ట్‌ చేయాలనే నా కల నిజమైంది. వివరాలు అతి త్వరలోనే తెలియజేస్తా’’ అంటూ చిరంజీవితో దిగిన ఫొటోని షేర్‌ చేశారు. సుకుమార్‌ అనూహ్య ప్రకటనతో సినీ అభిమానులు సర్‌ప్రైజ్‌ ఫీలవుతున్నారు. ఓ వాణిజ్య ప్రకటన కోసం ఈ ఇద్దరూ కలిసి పనిచేస్తున్నట్టు సమాచారం. ఇదే కాంబినేషన్‌లో ఓ సినిమా కూడా వచ్చే అవకాశం ఉన్నట్టు ప్రచారం జరుగుతోంది.

ఇటీవల.. ‘పుష్ప’తో మంచి విజయం అందుకున్న సుకుమార్‌ ప్రస్తుతం ఆ సినిమా సీక్వెల్‌ పనుల్లో బిజీగా ఉన్నారు. త్వరలోనే చిత్రీకరణ ప్రారంభంకానుంది. మరోవైపు, యువ నటుడు విజయ్‌ దేవరకొండతో ఓ చిత్రాన్ని ఇప్పటికే ప్రకటించారు. కొరటాల శివ దర్శకత్వంలో చిరంజీవి నటించిన ‘ఆచార్య’ ఏప్రిల్‌ 29న విడుదల కానుంది. మోహన్‌రాజా దర్శకత్వంలో ‘గాడ్‌ ఫాదర్‌’, మెహర్‌ రమేశ్‌ దర్శకత్వంలో ‘భోళాశంకర్‌’ సినిమాలు చేస్తున్నారు. కె. ఎస్‌. రవీంద్ర (బాబీ)తో ఓ చిత్రం ఖరారు చేశారు.