Bro: పవన్‌- సాయి ధరమ్‌తేజ్‌ల కాంబో.. త్రివిక్రమ్‌ ఐడియానే: సముద్రఖని

హైదరాబాద్‌: ప్రస్తుతం సినీ ప్రియులంతా ఎదురుచూస్తున్న సినిమా ‘బ్రో’ (Bro). సముద్రఖని దర్శకత్వంలో వస్తున్న ఈ చిత్రం జులై 28న ప్రేక్షకుల ముందుకు రానుంది. పవన్‌ కల్యాణ్ (Pawan Kalyan).. ఆయన మేనల్లుడు సాయి ధరమ్‌తేజ్‌ ప్రధాన పాత్రల్లో కనిపించనున్నారు. దీనికి ప్రముఖ దర్శకుడు త్రివిక్రమ్‌ (Trivikram) స్క్రీన్‌ప్లే, సంభాషణలు అందించారు. ఇక ఈ సినిమా విడుదల దగ్గరపడుతుండడంతో చిత్రబృందం ప్రచారం జోరు పెంచింది. ఈ సందర్భంగా సముద్రఖని ఓ ఇంటర్వ్యూలో మాట్లాడుతూ ‘బ్రో’ చిత్ర విశేషాలు పంచుకున్నారు.

‘బ్రో చిత్రం కోసం పవన్‌ కల్యాణ్‌, సాయి ధరమ్‌తేజ్‌(Sai Dharam Tej)లను త్రివిక్రమే ఎంపిక చేసినట్లు సముద్రఖని చెప్పారు. ఆయన మాట్లాడుతూ.. ‘‘ నేను త్రివిక్రమ్‌ వద్ద ఉన్న సమయంలో.. ఓ పెద్దాయన నాకు ఫోన్‌ చేసి ‘వినోదాయ సిథం’ (Vinodhaya Sitham) సినిమా చూశానని భావోద్వేగంతో మాట్లాడారు. ఆయన్ని ఓదార్చడానికి నాకు చాలా సమయం పట్టింది. దీంతో ‘ఎవరు ఫోన్‌ చేశారు..’ అని తివిక్రమ్‌ అడిగారు. నా సినిమా చూసి ఓ పెద్దాయన ఫోన్‌ చేశారని చెప్పాను. ‘స్టోరీ లైన్‌ ఏంటి’ అని అడిగారు. ‘అందరూ భవిష్యత్తు కోసం పరుగులు తీస్తున్నారు. కానీ, భవిష్యత్తు అనేది లేదు. మనం ప్రస్తుతం బతుకుతున్నది మాత్రమే నిజం’ అనే అంశమని తివిక్రమ్‌తో చెప్పాను. ఆయనకు ఈ లైన్‌ బాగా నచ్చింది. వెంటనే 10నిమిషాల్లో స్క్రిప్ట్‌, స్క్రీన్‌ప్లే మొత్తం స్థానికతకు తగ్గట్లు మార్పులు చేశారు. పవన్‌ కల్యాణ్‌, సాయి ధరమ్‌తేజ్‌లను హీరోలుగా ఎంపిక చేశారు’’ అని సముద్రఖని చెప్పారు. 

ఇలాంటి పాత్రలో మొదటిసారి నటించినందుకు ఆనందంగా ఉంది: విజయ్‌ వర్మ

కేతిక శర్మ (Ketika Sharma), ప్రియా ప్రకాశ్‌ వారియర్‌ (Priya Prakash Varrier) కథానాయికలుగా నటించిన ఈ సినిమాపై అభిమానులు భారీ అంచనాలు పెట్టుకున్నారు. ఇక పోస్టర్లు, టీజర్‌లతో ఆ అంచనాలు రెట్టింపయ్యాయి. తాజాగా ఈ సినిమాకు సెన్సార్‌ బోర్డు (Central Board of Film Certification) ఈ సినిమాకి క్లీన్‌ ‘యు’ (U) సర్టిఫికెట్‌ జారీ చేసింది. ప్రారంభంలో దాదాపు 15 నిమిషాలు మినహా సినిమా అంతా పవన్‌ కల్యాణ్‌ కనిపించనున్నారు. ‘బ్రో’ ప్రీ రిలీజ్ ఈవెంట్ ఈ నెల 25న జరగనున్నట్లు సమాచారం.