Dulquer Salmaan: ఆ సినిమా నా జీవితంలో గేమ్‌ ఛేంజర్‌: దుల్కర్‌

హైదరాబాద్‌: మహానటి సినిమాతో తెలుగులోనూ మంచి గుర్తింపు తెచ్చుకున్నాడు దుల్కర్‌ సల్మాన్‌(Dulquer Salmaan). తాజాగా ఈ టాలెంటెడ్‌ హీరో తాను నటించిన కురుప్‌(Kurup) సినిమా గురించి ఆసక్తికర వ్యాఖ్యలు చేశారు. ఆయన సొంత నిర్మాణ సంస్థ వే ఫారర్ ఫిల్మ్స్‌(Wayfarer Films)తో పాటు ఎం-స్టార్ ఎంటర్‌టైన్‌మెంట్స్‌తో కలిసి నిర్మించిన ఈ చిత్రం విడుదలై సంవత్సరం అయింది. ఈ సందర్భంగా ఆ సినిమాలోని ఫొటోలను పంచుకున్న దుల్కర్‌ ఇన్‌స్టా వేదికగా ఓ లేఖ రాశారు.

‘‘కురుప్‌.. ఈ సినిమా మా జీవితంలోనే పెద్ద గేమ్‌ ఛేంజర్‌.  మా మీద మాకు నమ్మకాన్ని పెంచి.. మా కలలను సాకారం చేసుకోడానికి ప్రోత్సాహాన్ని ఇచ్చింది. మా సంస్థ ఏదైనా సాధించగలదని నేను నమ్ముతున్నాను. మీకు ఎప్పటికీ గుర్తుండిపోయే అద్భుతమైన చిత్రాలను అందిస్తాం. ఈ చిత్రం కోసం ఎంతోమంది కష్టపడి పనిచేశారు. వాళ్లందరికి, మా భాగస్వాములందరికీ కృతజ్ఞతలు. అన్నింటి కంటే ముఖ్యంగా ఈ సినిమాను ఆదరించిన ప్రేక్షకులకు ధన్యవాదాలు’’ అని చెప్పారు.

దుల్కర్‌ సల్మాన్‌ హీరోగా నటించిన కురుప్‌ సినిమా గతేడాది నవంబర్‌లో పాన్‌ ఇండియా స్థాయిలో విడుదలైంది. నేర నేపథ్యంలో సాగే కథగా తెరముందుకు వచ్చిన ఈ సినిమా మంచి విజయాన్ని అందుకుంది.