Parineeti Chopra: ట్రాఫిక్‌లో చిక్కుకొని పాట పాడాను

‘నేను ట్రాఫిక్‌లో చిక్కుకున్నప్పుడు ‘అమర్‌ సింగ్‌ చమ్కీలా’ చిత్రం కోసం సింగింగ్‌ ఆడిషన్‌ ఇవ్వాల్సి వచ్చింది’ అని అంటోంది పరిణీతి చోప్రా. ఈమె..దిల్జీత్‌ దోసాంజ్‌ జంటగా నటించిన చిత్రమిది. తాజాగా ఓ వేడుకలో పాల్గొన్న పరిణీతి తనకి ఈ సినిమాలో పాటలు పాడే అవకాశం ఎలా వచ్చిందో తెలిపింది. ‘రెండేళ్ల క్రితం నేను కరణ్‌ జోహార్‌ పుట్టినరోజు వేడుకకు వెళ్తున్న సమయంలో దర్శకుడు ఇంతియాజ్‌ అలీ నుంచి ఫోన్‌ వచ్చింది. ‘దిల్జీజ్‌, రెహమాన్‌ కూడా జూమ్‌ కాల్‌లో ఉన్నారు. మీతో ఇప్పుడు మాట్లాడవచ్చా?’ అని అడిగారు. ట్రాఫిక్‌లో చిక్కుకున్న నేను కారులో ఉన్నవాళ్లని నిశ్శబ్దంగా ఉండమన్నాను. ఊపిరి కూడా పీల్చుకోలేనంత నిశ్శబ్దం చుట్టుముట్టింది. పాటలు పాడటం తెలుసా? అని రెహమాన్‌ సర్‌ అడిగితే..పాడటం అంటే ఇష్టమని చెప్పా. ఆ జూమ్‌ కాల్‌లో ‘దమా దమ్‌ మస్త్‌ కలందర్‌’ అనే పాటని పాడమన్నారాయన. వారికి నచ్చింది. అందులో నటనతోనే కాదు.. పాటలు పాడటంలో కూడా భాగమవుతున్నానని అప్పుడే అర్థమైంది’ అంటూ గుర్తుచేసుకుంది పరిణీతి. ‘ప్రకాశవంతంగా మెరిసే రంగీలా..అతడే మన అమర్‌ సింగ్‌ చమ్కీలా..’ అంటూ ఇటీవలే ఈ చిత్ర ట్రైలర్‌ని విడుదల చేశారు. ‘ప్రజలు ఎలాంటి పాటలు వినాలనుకుంటున్నారో నాకు తెలుసు. వారికి ఆ ఆనందాన్ని నేనివ్వగలను. మేము గాయకులం. పాడటమే మా పని’ లాంటి సంభాషణలతో ట్రైలర్‌ ఆద్యంతం ఆకట్టుకుంటోంది. ఈ సినిమా ఏప్రిల్‌ 12న ఓటీటీలో విడుదల కానుంది.