సంక్రాంతి సినిమాలతో ‘కోడిపందాలు’

బరిలో ఉండడం కంటే బయట ఉండడం బెటర్‌: నాగశౌర్య

హైదరాబాద్‌: సంక్రాంతి పండుగ అనగానే గుర్తుకువచ్చేది కోడి పందాలు. ప్రతి సంవత్సరం సంక్రాంతి పండుగ ప్రారంభంకాగానే గ్రామాల్లో కోడిపందాలు కూడా సందడిగా హుషారుగా జరుగుతుంటాయి. అయితే ఈ ఏడాది మాత్రం బాక్సాఫీస్‌ వద్ద జరగనున్న కోడిపందాల్లో అగ్రహీరోల చిత్రాలు పోటీపడుతోన్న విషయం తెలిసిందే. దీంతో బాక్సాఫీస్‌ వద్ద నిలిచేదెవరో? గెలిచేదెవరో అని ఆయా హీరోల అభిమానులు ఆసక్తిగా ఎదురుచూస్తోన్నారు. ఈ నేపథ్యంలో టాలీవుడ్‌ యువకథానాయకుడు నాగశౌర్య మాత్రం ‘కొన్ని కొన్నిసార్లు బరిలో ఉండడం కంటే బయటే ఉండడం బెటర్‌’ అని అంటున్నారు.

ఆయన కథానాయకుడిగా నటించిన చిత్రం ‘అశ్వత్థామ’. రమణ తేజ దర్శకత్వంలో తెరకెక్కిన ఈ చిత్రంలో నాగశౌర్యకు జంటగా మెహరీన్‌ నటించనున్నారు. ఈ సినిమాకు నాగశౌర్యనే కథ అందించారు. జనవరి 31న ఈ సినిమా విడుదల కానుంది. ఈవిషయాన్ని తెలియచేస్తూ ‘అశ్వత్థామ సంక్రాంతి కోడిపందాలు’ అనే పేరుతో ఓ స్పెషల్‌ వీడియోను నాగశౌర్య అభిమానులతో పంచుకున్నారు.