Gautham Menon: ప్రతినాయకుడి పాత్రలు చేయడం ఇష్టం: గౌతమ్‌మేనన్‌

ఇంటర్నెట్‌ డెస్క్‌: విఘ్నేశ్‌ శివన్‌ దర్శకత్వంలో తమిళ సూపర్‌స్టార్‌ అజిత్‌కుమార్‌, నయనతారల కలయికలో ఓ సినిమా(AK 62) రానున్న విషయం తెలిసిందే. ఈ సినిమాను ప్రకటించిన దగ్గరి నుంచే భారీ స్థాయిలో అంచనాలు నెలకొన్నాయి. ఇంకా పేరు ఖరారు కానీ ఈ సినిమా గురించి ఓ వార్త జోరుగా ప్రచారమవుతోంది. ఈ చిత్రంలో ప్రముఖ దర్శకుడు గౌతమ్‌మేనన్‌ విలన్‌ పాత్రలో నటించనున్నారనే ఊహాగానాలు మొదలయ్యాయి. వీటికి చెక్‌ పెడుతూ గౌతమ్‌మేనన్‌ ఓ ఇంటర్వ్యూలో సమాధానం చెప్పారు.

‘‘విఘ్నేశ్‌ నాకు చాలా మంచి ఫ్రెండ్‌. అయితే ఈ సినిమాలోని పాత్ర గురించి నాకు ఇంకా ఎటువంటి సమాచారం లేదు. నా దృష్టికి ఏ వార్త రాలేదు. ఒకవేళ విలన్‌ పాత్రకోసం నన్ను సంప్రదిస్తే నేను కచ్చితంగా ఒప్పుకొంటాను. ఎందుకంటే నాకు ప్రతినాయకుడిగా నటించడం ఇష్టం’’ అన్నారు. అలాగే విజయ్‌తో నటించాలని ఉందంటూ తన కోరికను బయటపెట్టాడు ఈ డైరెక్టర్‌. ‘‘చాలా కాలంగా విజయ్‌తో కలిసి నటించే అవకాశం కోసం ఎదురుచూస్తున్నా.  అతని వైపు నుంచి ఏమైనా అవకాశాలు వస్తే నేను నటిస్తాను.’’ అంటూ విజయ్‌తో నటించాలనే తన కోరికను చెప్పాడు గౌతమ్‌ మేనన్‌.