Yash: దూరంగా ఉంటాను.. తన పుట్టినరోజుపై యశ్‌ పోస్ట్‌..

ఇంటర్నెట్‌ డెస్క్‌: స్టార్‌ హీరో యశ్‌ (Yash) తన కొత్త సినిమాను ప్రకటించి నెలరోజులైంది. దానికి సంబంధించిన పూర్తి వివరాలు త్వరలోనే వెల్లడిస్తామని అప్పుడు చెప్పారు. దీంతో జనవరి 8న యశ్‌ పుట్టినరోజున దీని గురించి చెబుతారని అందరూ ఎదురుచూస్తున్నారు. ఈ నేపథ్యంలో తన బర్త్‌డేపై యశ్‌ పోస్ట్‌ చేశారు.

‘‘మీరంతా నా పుట్టినరోజు కోసం ఎదురుచూస్తున్నారని నాకు తెలుసు. నన్ను వ్యక్తిగతంగా కలిసి విషెస్‌ చెప్పాలని అభిమానులంతా ఆశపడుతున్నారు. నన్ను నమ్మండి.. మీతో కలిసి సమయాన్ని గడపడం నాకు అత్యంత విలువైన వాటిలో ఒకటి. కానీ, మనమంతా మరో రోజు కలుద్దాం. జనవరి 8న నేను అందుబాటులో ఉండను. ప్రత్యక్షంగా మిమ్మల్ని కలవలేకపోయినా.. మీ అందరి శుభాకాంక్షలు నా హృదయానికి చేరతాయి. అవి నాకు ఎప్పటికీ ప్రత్యేకమైనవే. నాతోనే ఉంటాయి’’ అని రాసుకొచ్చారు.

ఇక యశ్‌ కొత్త చిత్రానికి ‘టాక్సిక్‌’ (Toxic) అనే పేరును ఖరారు చేసిన సంగతి తెలిసిందే. ఏ ఫెయిరీ టేల్‌ ఫర్‌ గ్రోన్‌ అప్స్‌.. అన్నది ఉపశీర్షిక. మలయాళ దర్శకురాలు గీతూ మోహన్‌ దాస్‌ దీన్ని రూపొందిస్తున్నారు. ఈ చిత్రంలో సాయిపల్లవి కథానాయికగా కనిపించనున్నట్లు ప్రచారం జరుగుతోంది. అలాగే ఇందులో బాలీవుడ్‌ హీరోయిన్ కరీనా కపూర్‌ కీలకపాత్రలో కనిపించనున్నట్లు కూడా టాక్‌. ‘కేజీయఫ్‌’ చిత్రాల తర్వాత యశ్‌ నుంచి వస్తున్న సినిమా కావడంతో దీనిపై ఇప్పటికే ప్రేక్షకుల్లో భారీ అంచనాలు నెలకొన్నాయి.