Kailash Kher: సింగర్‌ కైలాశ్‌ ఖేర్‌పై వాటర్‌ బాటిళ్లతో దాడి..

ఇంటర్నెట్‌డెస్క్‌: హిందీతోపాటు దక్షిణాది చిత్రాల్లోనూ హిట్‌ సాంగ్స్‌ ఆలపించిన ప్రముఖ సింగర్‌ కైలాశ్‌ ఖేర్‌(Kailash Kher)కు చేదు అనుభవం ఎదురైంది. ‘హంపీ ఉత్సవ్‌’(Hampi Ustav)లో పాల్గొన్న ఆయనపై దాడి జరిగింది. కన్నడ భాషలో పాటలు పాడాలని డిమాండ్‌ చేస్తూ ఇద్దరు యువకులు వాటర్‌ బాటిల్స్‌ విసిరారు. ఈ ఘటనతో అక్కడ ఉన్న వారందరూ షాక్‌ అయ్యారు.

కర్ణాటక ప్రభుత్వం ఆధ్వర్యంలో ప్రతి ఏడాదిలాగానే ఈ సంవత్సరం కూడా ‘హంపీ ఉత్సవాలు’ వేడుకగా జరిగాయి. జనవరి 27 నుంచి 29 వరకు జరిగిన ఈ వేడుకల్లో భారీ సంఖ్యలో ప్రజలు పాల్గొన్నారు. పలు ప్రాంతాలకు చెందిన కళాకారులు ఈ వేడుకల్లో పాల్గొని సాంస్కృతిక కార్యక్రమాలతో అలరించారు. ఇందులో భాగంగా ఆదివారం జరిగిన కార్యక్రమంలో గాయకుడు కైలాశ్‌ ఖేర్‌ పాల్గొని హిందీ పాటలు ఆలపించారు. అయితే, తమకు కన్నడ పాటలు కావాలని డిమాండ్‌ చేస్తూ జన సమూహంలో నుంచి ఇద్దరు వ్యక్తులు ఆయనపైకి వాటర్‌ బాటిల్స్‌ విసిరారు. ఈ ఘటనతో అక్కడ ఉన్నవారందరూ కంగుతిన్నారు. విషయం తెలుసుకున్న కర్ణాటక పోలీసులు రంగంలోకి దిగి.. ఆ ఇద్దరు యువకులను అరెస్టు చేశారు.

‘పరుగు’, ‘మిర్చి’, ‘భరత్‌ అనే నేను’ వంటి తెలుగు చిత్రాల్లో కైలాశ్‌ పాటలు ఆలపించారు. ‘బాహుబలి’ హిందీ, తమిళ వెర్షన్స్‌లో ఆయన పాటలు పాడారు.