NTR: కర్ణాటక సీఎం ప్రత్యేక ఆహ్వానం.. విధానసౌధకు వెళ్లనున్న ఎన్టీఆర్‌

హైదరాబాద్‌: టాలీవుడ్‌ స్టార్‌ హీరో ఎన్టీఆర్‌ (NTR) త్వరలో కర్ణాటకకు వెళ్లనున్నారు. ఆ రాష్ట్ర ముఖ్యమంత్రి బసవరాజ్‌ బొమ్మై (Basavaraj Bommai) ఆహ్వానం మేరకు నవంబర్‌ 1న అక్కడి విధానసౌధలో జరగనున్న ‘కన్నడ రాజ్యోత్సవ’ వేడుకల్లో ఆయన పాల్గొననున్నారు. ఈ వేడుకల్లో భాగంగా కన్నడ స్టార్‌, దివంగత నటుడు పునీత్‌ రాజ్‌కుమార్‌కు కర్ణాటకలో విశిష్ఠ పురస్కారంగా భావించే ‘కర్ణాటక రత్న’ అవార్డు ఇవ్వనున్నారు. ఈ అవార్డు అందుకున్న తొమ్మిదో వ్యక్తిగా పునీత్‌ పేరు సొంతం చేసుకున్నారు. తెలుగులోనే కాకుండా కర్ణాటకలోనూ ఎన్టీఆర్‌కు ఉన్న విశేష ఆదరణ, పునీత్‌తో ఆయనకు ఉన్న అనుబంధాన్ని దృష్టిలో పెట్టుకుని ఈ ఆహ్వానం పంపించినట్లు తెలుస్తోంది. ఈ కార్యక్రమానికి తారక్‌తోపాటు రజనీకాంత్‌, జ్ఞానపీఠ్​అవార్డు గ్రహీత చంద్రశేఖర్ కంబర్, పునీత్‌ రాజ్‌కుమార్‌ కుటుంబానికి కూడా ఆహ్వానాలు అందాయి.