‘కోలుకోలు’ పాట మేకింగ్‌ వీడియో చూశారా..!

ఇంటర్నెట్‌ డెస్క్‌: స్వచ్ఛమైన పల్లెటూరి యువతి మనసులో ప్రేమ కలిగితే అది ఎంత గాఢంగా, ఎంత సాంద్రంగా, ఎంత తీవ్రంగా ఉంటుందో చెప్పడమే ఈ ‘కోలుకోలు’ పాట ముఖ్య ఉద్దేశమని ప్రముఖ గేయ రచయిత చంద్రబోస్‌ అన్నారు. ‘విరాట పర్వం’ చిత్రం నుంచి ఇటీవల విడులైన ఈ ‘కోలుకోలు’ పాట సంగీత ప్రియులను విశేషంగా ఆకట్టుకుంటోంది. ఈ నేపథ్యంలో చిత్రబృందం సాంగ్‌ మేకింగ్‌ వీడియోను యూట్యూబ్‌లో పంచుకుంది. ఈ పాట ఇంత అద్భుతంగా రావడానికి గల అంశాలను చిత్రబృందం ఆ వీడియోలో పంచుకుంది. బాణీతోపాటే పాట పుట్టిందేమో అనిపించేలా చంద్రబోస్‌ అద్భుతంగా పాటను రాశారని సంగీత దర్శకులు సురేశ్‌ బొబ్బిలి అన్నారు. ఈ పాటను దివ్య మాలిక ఆలపించారు.

కాగా.. 90వ దశకంలో తెలుగు రాష్ట్రాల్లో నక్సలిజం ఇతివృత్తంగా డైరెక్టర్‌ వేణు ఉడుగుల ‘విరాట పర్వం’ చిత్రాన్ని తెరకెక్కించారు. రానా దగ్గుబాటి, సాయిపల్లవి జంటగా కనిపించనున్నారు. ప్రియమణి కీలక పాత్రలో సందడి చేయనుంది. ఈ చిత్రం ఏప్రిల్‌ 30 ప్రేక్షకుల ముందుకు రానుంది.