Maanaadu: శింబు సినిమా సీక్వెల్‌ రానుందా..!

హైదరాబాద్‌: మన్మథ లాంటి ప్రేమకథా చిత్రంతో టాలీవుడ్‌లో మంచి పేరు తెచ్చుకున్నాడు శింబు. ఈ టాలెంటెడ్‌ హీరో కథానాయకుడిగా నటించిన మానాడు తమిళ చిత్రం తెలుగులో ‘ది లూప్‌’ పేరుతో విడుదలై ప్రేక్షకాదరణ పొందిన విషయం తెలిసిందే. శింబు కెరీర్‌లో రూ.100 కోట్లు రాబట్టిన చిత్రంగా ఈ సినిమా నిలిచిపోయింది. ప్రస్తుతం ఈ సినిమాకు సంబంధించిన వార్త ఒకటి నెట్టింట చక్కర్లు కొడుతుంది. ఈ సినిమాకు సీక్వెల్‌ తీయాలని మేకర్స్‌ భావిస్తున్నారట. ఈ సినిమా విడుదలై ఏడాది పూర్తయిన సందర్భంగా చిత్ర యూనిట్‌ మేకింగ్‌ జర్నీ వీడియోను షేర్‌ చేసింది.

వీడియోకు ‘లూప్‌ త్వరలోనే కొనసాగుతుంది..’ అనే వ్యాఖ్య జోడించారు. దీంతో ఈ సినిమా సీక్వెల్‌ రానుందని ఫ్యాన్స్‌ సోషల్‌మీడియాలో సందడి చేస్తున్నారు. వీడియో విడుదలైనప్పటి నుంచి సినీ అభిమానులు సంతోషిస్తున్నారు. వెంకట్‌ ప్రభు దర్శకత్వంలో రూపొందిన ఈ తమిళ చిత్రం విమర్శకుల ప్రశంసలు అందుకుంది. టైమ్‌లూప్‌లో చిక్కుకున్న అబ్దుల్‌ ఖాలిక్‌ పాత్ర అందరినీ ఎంతగానో ఆకట్టుకుంది. చిత్ర యూనిట్‌ అభిమానుల కోసం నవంబర్‌ 27న ప్రత్యేక షో నిర్వహించనుంది. సినిమా క్లైమాక్స్‌లోనూ సీక్వెల్‌ ఉంటుందని చిత్ర బృందం హింట్‌ ఇచ్చింది.