Mahesh Babu: ఆయన వీరాభిమానుల్లో నేనూ ఒకడిని.. మహేశ్‌బాబు ఎమోషనల్‌ లెటర్‌ వైరల్‌

హైదరాబాద్‌: తన తండ్రి, సూపర్‌స్టార్‌ కృష్ణ (Krishna) జయంతిని పురస్కరించుకుని మహేశ్‌బాబు (MaheshBabu) భావోద్వేగానికి గురయ్యారు. కృష్ణ నటించిన ‘మోసగాళ్లకు మోసగాడు’ (Mosagallaku Mosagadu) సినిమా రీ రిలీజ్‌ కావడంపై ఆయన స్పందించారు. ఈ మేరకు బుధవారం ఆయన ఓ లేఖను విడుదల చేశారు. తన తండ్రికి ఉన్న వీరాభిమానుల్లో తానూ ఒకడిని అని చెప్పారు.

‘‘నాన్నగారి వీరాభిమానుల్లో నేనూ ఒకడిని. పద్మాలయా స్టూడియోస్‌ బ్యానర్‌పై ఆయన తెరకెక్కించిన ఎన్నో గొప్ప సినిమాల్లో ‘మోసగాళ్లకు మోసగాడు’ (Mosagallaku Mosagadu) అంటే అభిమానులకు ప్రత్యేకమైన అభిమానం. ఆ రోజుల్లోనే హాలీవుడ్‌ చిత్రాలను తలదన్నే స్థాయిలో ఒక తెలుగు చిత్రాన్ని నిర్మించిన సాహసి ఆయన. యాభైరెండేళ్ల క్రితమే గుర్రాలు, గన్‌ ఫైటింగులు, భారీ సెట్టింగులు, అందమైన లొకేషన్స్‌, ట్రెజర్‌ హంట్‌, అతిపెద్ద తారాగణం, కౌబాయ్‌ గెటప్స్‌తో బడ్జెట్‌ పరిధులు దాటి.. తెలుగు ప్రేక్షకులకి మాత్రమే కాదు, ఇంగ్లీష్‌, హిందీ, తమిళం, బెంగాలీ వంటి అన్ని భాషల్లోనూ ఈ సినిమాను 50 దేశాల్లో చూపించిన ఘనత ఆయనది. నాన్నగారి జయంతిని పురస్కరించుకుని నేడు ప్రపంచవ్యాప్తంగా ఈ చిత్రాన్ని విడుదల చేస్తున్నాం. తెలుగు సినిమాకు కొత్త సాంకేతిక పరిజ్ఞానాన్ని అందించిన లెజెండ్‌ ఆయన. మొదటి స్టీరియో సౌండ్‌, సినిమా స్కోప్‌, 70 ఎమ్‌ ఎమ్‌, మొదటి జేమ్స్‌బాండ్‌, కౌబాయ్‌.. ఇలా అన్ని కొత్త హంగులను తెలుగు సినిమాలకి తెచ్చి, సినిమా స్థాయిని ప్రపంచవ్యాప్తంగా పెంచిన నాన్న జ్ఞాపకార్థం మనమందరం మళ్లీ ‘మోసగాళ్లకు మోసగాడు’ డిజిటల్‌లో కొత్త సాంకేతిక విలువలతో చూసి, ఆనందాన్ని పొంది ఆయన్ని స్మరించుకుందాం’’ అని మహేశ్‌బాబు రాసుకొచ్చారు.