Chiranjeevi: చిరు సరసన... ఈ ఇద్దరిలో ఒకరా?

అనుష్క... నయనతార. ఈ సీనియర్‌ కథానాయికలిద్దరి సినిమాలూ ప్రస్తుతం థియేటర్లలో సందడి చేస్తున్నాయి. నయనతార ‘జవాన్‌’తో అదరగొడుతుండగా... అనుష్క ‘మిస్‌ శెట్టి మిస్టర్‌ పొలిశెట్టి’తో హంగామా చేస్తోంది. సీనియర్‌ భామలైన వీళ్లు తమ అనుభవాన్నంతా రంగరించి పాత్రల్ని రక్తి కట్టిస్తున్నారు.  వీళ్లిద్దరి పేర్లూ ఇప్పుడు చిరంజీవి సినిమా విషయంలో ప్రముఖంగా వినిపిస్తున్నాయి. చిరంజీవి కథానాయకుడిగా వశిష్ట దర్శకత్వంలో ఓ చిత్రం రూపొందనుంది. యూవీ క్రియేషన్స్‌ సంస్థ నిర్మించనుంది. ఫాంటసీ కథతో రూపొందుతున్న ఈ సినిమా అక్టోబరులో కానీ, నవంబరులో కానీ పట్టాలెక్కనుంది. ప్రస్తుతం కథానాయికల ఎంపికపై కసరత్తులు కొనసాగుతున్నాయి. అనుష్క, నయనతార పేర్లతోపాటు... బాలీవుడ్‌కి చెందిన ఓ హీరోయిన్‌ పేరుని కూడా పరిశీలిస్తున్నారు. ఎవరు ఖరారవుతారనేది చూడాలి మరీ!