Nootokka Jillala Andagadu: ఆ ఓటీటీలో శ్రీనివాస్‌ అవసరాల ‘నూటొక్క జిల్లాల అందగాడు’

హైదరాబాద్‌: వైవిధ్య కథలు, పాత్రలతో అలరించే యువ నటుల్లో అవసరాల శ్రీనివాస్‌ ఒకరు. ఆయన కీలక పాత్రలో తెరకెక్కిన చిత్రం ‘నూటొక్క జిల్లాల అందగాడు’. రుహానీ శర్మ కథానాయిక. రాచకొండ విద్యాసాగర్‌ దర్శకత్వం వహిస్తున్నారు. సెప్టెంబరు 3న థియేటర్‌లలో విడుదలైన ఈ సినిమా అంచనాలను అందుకోలేకపోయింది. ఇప్పుడు ఓటీటీ వేదికగా ప్రేక్షకులను అలరించేందుకు ముందుకు వచ్చింది. ప్రముఖ ఓటీటీ వేదికగా అమెజాన్‌ ప్రైమ్‌ వీడియో వేదికగా ‘నూటొక్క జిల్లాల అందగాడు’ స్ట్రీమింగ్‌ అవుతోంది. పెళ్లికాక ముందే బట్టతల రావడంతో అది కనిపించకుండా గొత్తి సత్యనారాయణ అనే యువకుడు విగ్గు పెట్టుకుంటాడు. అది చూసి అందరూ అతడిది నిజమైన జుట్టు అనుకుంటారు. ఒక అమ్మాయి కూడా ప్రేమలో పడుతుంది. బట్టతల కనపడనీయకుండా చేసేందుకు సత్యనారాయణ చేసిన ప్రయత్నాలు ఏంటి? తెలిసిన తర్వాత ఆ అమ్మాయి అతడిని ప్రేమించిందా? తదితర ఆసక్తికర అంశాలతో ఈ సినిమాను తీర్చిదిద్దారు. శిరీష్‌, రాజీవ్‌రెడ్డి, సాయిబాబు జాగర్లమూడి నిర్మాతలు. దిల్‌రాజు, జాగర్లమూడి క్రిష్‌ ఈ చిత్రాన్ని సమర్పించారు.

► Read latest Cinema News and Telugu News