Pawan kalyan: పాకిస్థాన్‌లోనూ టాప్‌ ట్రెండింగ్‌లో ‘బ్రో’.. ఏ స్థానంలో ఉందంటే?

ఇంటర్నెట్‌ డెస్క్‌: పవన్‌కల్యాణ్‌ (Pawan Kalyan) తన మేనల్లుడు సాయిధరమ్‌ తేజ్‌ (Sai Dharam Tej)తో కలిసి నటించిన చిత్రం ‘బ్రో’(BRO). జులైలో ప్రేక్షకుల ముందుకు వచ్చిన ఈ సినిమా మంచి టాక్‌ను సొంతం చేసుకుంది. తాజాగా ఈ చిత్రం ఓటీటీలో నెట్‌ఫ్లిక్స్‌ వేదికగా ప్రసారం అవుతోంది. అయితే, ఓటీటీలో ఈ చిత్రం ట్రెండింగ్‌లో నిలవడం విశేషం. భారత్‌లోనే కాదు.. పాకిస్థాన్‌, బంగ్లాదేశ్‌లలోనూ ‘బ్రో’ సినిమా రికార్డు సృష్టిస్తోంది. ప్రస్తుతం దీనికి సంబంధించిన పోస్టర్లు సోషల్‌మీడియాలో వైరల్‌గా మారాయి. 

అప్పుడే పెళ్లి చేసుకుంటా.. ఆ విషయం ఎవరికీ చెప్పను: విజయ్‌ దేవరకొండ

నెట్‌ఫ్లిక్స్‌లో రిలీజ్‌ అయిన దగ్గరి నుంచి ఈ చిత్రం టాప్‌లో కొనసాగుతూనే ఉంది. తాజాగా ఆగస్టు 21 నుంచి 27 వరకు నెట్‌ఫ్లిక్స్‌ విడుదల చేసిన సమాచారం ప్రకారం ఈ చిత్రం ఇండియాలో నం.1లో ఉండగా..  నాన్‌ ఇంగ్లిష్‌ సినిమాల లిస్ట్‌లో టాప్‌7లో నిలిచింది. అలాగే పాకిస్థాన్‌, బంగ్లాదేశ్‌లలో టాప్‌8లో ఉంది. దీంతో పవన్‌కల్యాణ్ (Pawan Kalyan) అభిమానులు తెగ సంతోషపడుతున్నారు. ఇక జులై 28న ప్రేక్షకుల ముందుకు వచ్చిన ఈ చిత్రం అనుకున్న స్థాయిలో కలెక్షన్లు వసూళ్లు చేయలేకపోయింది. తమిళంలో వచ్చిన ‘వినోదాయసిత్తం’కు రీమేక్‌గా దీనిని తెరకెక్కించారు. సముద్రఖని (Samuthirakani) దర్శకత్వం వహించగా.. మాటల మాంత్రికుడు త్రివిక్రమ్‌ (Trivikram Srinivas) ఈ సినిమాకు స్క్రీన్‌ప్లే, సంభాషణలు రాయడం విశేషం. పవన్‌ కల్యాణ్‌ కాలం అనే దేవుడి పాత్రలో కనిపించగా.. కేతిక శర్మ హీరోయిన్‌గా నటించింది.  ప్రియా ప్రకాశ్‌ వారియర్‌, బ్రహ్మానందం, సుబ్బరాజు తదితరులు నటించారు.