Pooja hegde : ఎవరితో జోడీ కట్టేనో?

తెలుగులో మొన్నటిదాకా అగ్ర హీరోలు మొదలుకొని...యువతారల చిత్రాల వరకూ కథానాయిక ఎంపిక పూజాహెగ్డే నుంచే మొదలయ్యేది. ఆమె కాల్షీట్లు ఖాళీ లేకపోతేనో... లేదంటే చేయలేనని చెబితేనో అవి మరొకరి దగ్గరికి వెళ్లేవి. అంతగా ఆమె ప్రభావం చూపింది. ఒకేసారి రెండు మూడు సినిమాలు చేస్తూ బిజీ బిజీగా గడిపేది. కానీ ఒక్కసారిగా ఆమె తెలుగు పరిశ్రమకి విరామం ఇచ్చింది. కొంతకాలంగా బాలీవుడ్‌ ప్రాజెక్టులపైనే దృష్టిపెట్టింది. త్వరలోనే ఆమె తెలుగు సినిమాలతో మళ్లీ బిజీ కానున్నట్టు సమాచారం. కొంతకాలంగా తెలుగు దర్శకనిర్మాతలు చెబుతున్న కథల్ని వింటూ వచ్చిన పూజా... త్వరలోనే ఒకట్రెండు సినిమాలకి పచ్చజెండా ఊపడానికి సిద్ధమైనట్టు సమాచారం. అందులో నాని సినిమా కూడా ఉందని ప్రచారం సాగుతోంది. నాని కథానాయకుడిగా తమిళ దర్శకుడు శిబి చక్రవర్తి దర్శకత్వంలో ఓ చిత్రం రూపొందే అవకాశాలున్నాయి. ఆ సినిమా కోసం పూజాహెగ్డేని కథానాయికగా ఎంపిక చేసుకోనున్నట్టు తెలుస్తోంది. దుల్కర్‌ సల్మాన్‌, సాయిధరమ్‌ తేజ్‌ తదితరుల చిత్రాల్లోనూ ఆమె నటించే అవకాశాలున్నట్టు సమాచారం.