Prakash Raj: అప్పూ సేవలను కొనసాగిస్తూ.. ప్రకాశ్‌రాజ్‌ కీలక ప్రకటన

ఇంటర్నెట్‌ డెస్క్‌: తన పుట్టినరోజు సందర్భంగా ప్రముఖ నటుడు ప్రకాశ్‌రాజ్‌ శనివారం కీలక ప్రకటన చేశారు. కన్నడ నటుడు దివంగత పునీత్‌ రాజ్‌కుమార్‌ (అప్పూ) సేవలను ‘ప్రకాశ్‌రాజ్‌ ఫౌండేషన్‌’ ద్వారా ముందుకు తీసుకెళ్తున్నట్టు తెలిపారు. సంబంధిత వివరాలు త్వరలోనే పంచుకుంటానన్నారు. ఈ మేరకు అప్పూ ఫొటోతో కూడిన ఓ పోస్టర్‌ను విడుదల చేశారు. ఇందులో ‘అప్పూ ఎక్స్‌ప్రెస్‌’ అని రాసి ఉంది. ఈ పోస్ట్‌పై ఇప్పటికే పలువురు నెటిజన్లు స్పందించారు. కామెంట్ల రూపంలో ఆయన్ను అభినందించారు. తన ఫౌండేషన్‌ ద్వారా ప్రకాశ్‌రాజ్‌ లాక్‌డౌన్‌/ కొవిడ్‌ సమయంలో ఎంతోమందికి సాయం చేశారు. తన ఫాంహౌస్‌లో ఆశ్రయం ఇచ్చారు. ఇప్పుడు.. మరో అడుగు ముందుకేశారు. ఎన్నో సేవా కార్యక్రమాలతో కోట్ల హృదయాల్ని గెలిచిన పునీత్‌ గుండెపోటుతో గతేడాది హఠాన్మరణం చెందిన సంగతి తెలిసిందే.