Prathinidhi 2: నిర్ణయించుకో.. నిన్నెవరు పాలించాలో!

‘రాష్ట్రానికి అప్పులు పెరుగుతుంటే... మీ ఆస్తులు మాత్రం ఎలా పెరుగుతున్నాయి సర్‌?’ అంటూ సూటిగా ప్రశ్నించాడు ఓ పాత్రికేయుడు. మరి సదరు నాయకుడి సమాధానం ఏమిటో తెలియాలంటే ‘ప్రతినిధి2’ చూడాల్సిందే. నారా రోహిత్‌ కథానాయకుడిగా నటించిన చిత్రమిది. మూర్తి దేవగుప్తపు దర్శకత్వం వహించారు. కుమార్‌రాజా బత్తుల, ఆంజనేయులు శ్రీతోట, సురేంద్రనాథ్‌ బొల్లినేని నిర్మాతలు.  సిరీ లెల్ల, దినేశ్‌ తేజ్‌, సప్తగిరి, జిషు సేన్‌ గుప్తా కీలక పాత్రలు పోషించారు. ఈ నెలలోనే ప్రేక్షకుల ముందుకు రానున్న ఈ సినిమా ట్రైలర్‌ని ప్రముఖ దర్శకుడు సుకుమార్‌ శుక్రవారం విడుదల చేశారు. ‘మన స్వాతంత్య్రం కోసం పోరాడిన గాంధీజీ చనిపోయినప్పుడు ఎంతమంది ఆత్మహత్య చేసుకున్నారు? ఎంతమంది గుండెపోటుతో చచ్చారు?’  అంటూ మొదలయ్యే ట్రైలర్‌ ఆసక్తిని రేకెత్తిస్తోంది. ‘ఒక్కసారి ఎక్కి కూర్చున్నాడంటే ఐదేళ్లు చెప్పింది చేయాల్సిందే, డిసైడ్‌ చేసుకో, నిన్ను ఎవరు పరిపాలించాలో...’ అంటూ కథానాయకుడు చెప్పే మాటలు ట్రైలర్‌కి ఆకర్షణగా నిలిచాయి. రాజకీయ వ్యవస్థలోని అవినీతిని ప్రశ్నిస్తూ సాగే కథతో రూపొందిన సినిమా ఇది. మహతి స్వరసాగర్‌ సంగీతం అందించారు.