Rajinikanth: హిందీ నిర్మాతతో రజనీకాంత్‌ కొత్త చిత్రం

బాలీవుడ్‌ సీనియర్‌ నిర్మాత సాజిద్‌ నడియాడ్‌వాలా.. తమిళ అగ్ర కథానాయకుడు రజనీకాంత్‌తో చేతులు కలిపారు. వీరిద్దరూ కలసి ఓ కొత్త చిత్రం చేయనున్నారనే ఆసక్తికర విషయాన్ని మంగళవారం సామాజిక మాధ్యమాల ద్వారా వెల్లడిస్తూ.. ఇద్దరూ కలిసి ఉన్న ఓ ఫొటో పంచుకున్నారు. అయితే ఇది తమిళంలో రూపొందుతుందా? హిందీలో చేస్తారా? అనేది స్పష్టం చేయకపోవడంతో సినీవర్గాలు, ప్రేక్షకుల్లో రకరకాల ఊహాగానాలు మొదలయ్యాయి. ‘దిగ్గజ నటుడు రజనీకాంత్‌తో కలిసి పని చేయడం నాకొక గౌరవం. మర్చిపోలేని మా ప్రయాణం మొదలు కానున్న నేపథ్యంలో ఈ ప్రాజెక్టుపై అంచనాలు ఆకాశాన్ని అంటడం ఖాయం’ అంటూ సాజిద్‌ ఎక్స్‌ ద్వారా వ్యాఖ్యానించారు. దీనిపై ప్రముఖ సినీ విమర్శకుడు తరణ్‌ ఆదర్శ్‌ సైతం స్పందించారు. ‘రజనీకాంత్‌-సాజిద్‌ నడియాడ్‌వాలా కలిసి మొదటిసారి ఓ చిత్రం చేయనున్నారు. త్వరలోనే పూర్తి వివరాలు ప్రకటిస్తారు’ అని పేర్కొన్నారు. రజనీకాంత్‌ చివరిసారి ‘లాల్‌ సలామ్‌’లో కనిపించిన విషయం విదితమే.