Hero Tarun: తరుణ్‌ను అలా చూసి మాకు ఏడుపు వచ్చింది..: రోజా రమణి

హైదరాబాద్‌: బాల నటుడిగా ఇండస్ట్రీలోకి వచ్చి స్టార్‌ ఇమేజ్‌ను సొంతం చేసుకున్నాడు హీరో తరుణ్‌ (Tarun). తర్వాత వరుస విజయాలు అందుకుని సినీ ప్రేక్షకులను అలరించాడు. మంచి సినిమాలతో లవర్‌ బాయ్ ఇమేజ్‌ను సొంతం చేసుకున్నాడు. గత కొంతకాలంగా సినిమాలకు దూరంగా ఉన్న ఈ హీరో ఇటీవల జరిగిన ‘నువ్వే నువ్వే’ 20 ఏళ్ల  కార్యక్రమంలో కనిపించాడు. తరుణ్‌ తల్లి, అలనాటి హీరోయిన్‌ రోజా రమణి (Roja Ramani) తాజాగా ఓ ఇంటర్వ్యూలో మాట్లాడుతూ అతడి గురించి ఆసక్తికర వ్యాఖ్యలు చేశారు.

‘‘తరుణ్‌కు చిన్నప్పటి నుంచి భక్తి ఎక్కువ. ప్రతిరోజూ గంటన్నర సేపు పూజ చేసుకోకుండా బయటకు వెళ్లడు. అలాగే సాయం చేయడంలోనూ ముందుంటాడు. నేను నటించిన తొలి సినిమాకు నాకు నేషనల్‌ అవార్డు వచ్చింది. అలాగే తరుణ్‌ నటించిన తొలి సినిమాకు కూడా తను నేషనల్‌ అవార్డు అందుకున్నాడు. అది అందుకుంటున్నప్పుడు తరుణ్‌ని చూసి నాకు, మావారికి కన్నీళ్లు ఆగలేదు. ఎంతో ఆనందం వేసింది’’ అని చెప్పారు. ఇక తరుణ్‌పై వచ్చిన రూమర్స్‌ గురించి మాట్లాడుతూ.. ‘‘ఎలాంటి ఆధారం లేకుండా రూమర్స్‌ రాస్తారు. అవి చూసినప్పుడు బాధేస్తుంది. ఎందుకిలా రాస్తున్నారనిపిస్తుంది. అసత్య ప్రచారాల గురించి బాధపడడం ఎందుకని.. అలాంటి వార్తలను పట్టించుకోవడం లేదు. ప్రస్తుతం అభిమానుల ఆశీర్వాదం వల్ల మేమంతా బాగున్నాం.  తరుణ్‌ పెళ్లి ఒక్కటైతే చాలు. అంతకు మించి ఏం కోరికలు లేవు. అది సమయం వచ్చినప్పుడు అవుతుంది’’ అని రోజా రమణి తెలిపారు.

అలాగే తరుణ్‌ త్వరలోనే సినిమాల్లోకి రీ ఎంట్రీ ఇవ్వనున్నట్లు ఆమె వెల్లడించారు. వెబ్‌ సిరీస్‌తో పాటు ఒక సినిమాను కూడా ఓకే చేసినట్లు చెప్పారు. అయితే ఈ రెండింటిలో ఏది ముందు విడుదలవుతుందో చూడాలన్నారు. ప్రేక్షకుల ఆశీర్వాదంతో తరుణ్‌ కచ్చితంగా మరోసారి సినీ రంగంలో రాణిస్తాడని ఆమె ఆశాభావం వ్యక్తం చేశారు.