Rajamouli: ‘ఆర్‌ఆర్‌ఆర్‌’ సరికొత్త రికార్డు.. సంతోషంలో దర్శకధీరుడు

హైదరాబాద్‌: రాజమౌళి (Rajamouli) తెరకెక్కించిన ‘ఆర్‌ఆర్‌ఆర్‌’ (RRR) చిత్రం మరో రికార్డు అందుకుంది. జపాన్‌ దేశంలో అత్యధిక సెంటర్లలో వందరోజులు పూర్తి చేసుకుంటోన్న తొలి భారతీయ చిత్రంగా ‘ఆర్‌ఆర్‌ఆర్‌’ ఘనత దక్కించుకుంది. ఈ విషయంపై రాజమౌళి ఆనందం వ్యక్తం చేశారు. జపాన్‌లోని 114 కేంద్రాల్లో శత దినోత్సవం చేసుకుంటోన్న తొలి భారతీయ చిత్రం ‘ఆర్‌ఆర్‌ఆర్‌’ అని ఉన్న ఓ పోస్టర్‌ని ఆయన షేర్‌ చేశారు.

‘‘మునపటి రోజుల్లో ఒక సినిమా 100 రోజులు, 175 రోజులు లేదా అంతకు మించి ఆడితే అది చాలా పెద్ద విషయం. ఆ రోజులన్నీ మధుర జ్ఞాపకాలే. కాలక్రమేణా వ్యాపారం తీరు మారింది. కానీ, ఇప్పుడు జపాన్‌లోని సినీ ప్రియులు మాకు మళ్లీ ఆ రోజుల్ని గుర్తు చేశారు. మేము తిరిగి ఆ ఆనందాన్ని పొందేలా చేశారు. లవ్‌ యూ జపాన్‌, థ్యాంక్యూ’’ అని రాజమౌళి పేర్కొన్నారు. దీనిపై సినీ ప్రియులు చిత్రబృందానికి కంగ్రాట్స్‌ చెబుతున్నారు. రామ్‌చరణ్‌ - ఎన్టీఆర్‌ నటించిన ‘ఆర్‌ఆర్‌ఆర్‌’ సినిమా గతేడాది విడుదలై భారీ విజయాన్ని సొంతం చేసుకుంది. ప్రపంచవ్యాప్తంగా వస్తోన్న ఆదరణను దృష్టిలో ఉంచుకుని గతేడాది అక్టోబర్‌ నెలలో ఈ చిత్రాన్ని జపాన్‌లో విడుదల చేశారు. ఆ దేశంలోనూ ఈ చిత్రానికి ప్రేక్షకుల నుంచి మంచి స్పందన లభించింది.